Fótbolti

Inzaghi hættur með Inter og stýrir nýju liði á HM

Sindri Sverrisson skrifar
Simone Inzaghi kveður Inter með tvö silfur úr Meistaradeild Evrópu á fjórum árum.
Simone Inzaghi kveður Inter með tvö silfur úr Meistaradeild Evrópu á fjórum árum. Getty/Richard Sellers

Ítalski stjórinn Simone Inzaghi hefur ákveðið, eftir að hafa í annað sinn á þremur árum komið Inter í úrslitaleik Meistaradeildar Evrópu, að segja skilið við félagið og taka við Al Hilal í Sádi-Arabíu.

Fréttamaðurinn Fabrizio Romano er á meðal þeirra sem segja frá þessu en Inzaghi átti fund með forráðamönnum Inter í dag.

Á laugardaginn horfði hann á lærisveina sína tapa gegn PSG í úrslitaleik Meistaradeildarinnar en liðið komst einnig í úrslitaleikinn 2023. 

Undir stjórn Inzaghi varð Inter ítalskur meistari í fyrra og vann tvo bikarmeistaratitla auk ítalska ofurbikarsins í þrígang.

Forráðamenn Inter eru sagðir sækja það fast að fá nú Cesc Fabregas frá Como til að taka við liðinu, áður en að HM félagsliða hefst.

Inzaghi mun aftur á móti stýra Al Hilal á því móti og byrja á leik við Real Madrid 18. júní.




Fleiri fréttir

Sjá meira


×