Sá glitta í þá Söru Sigmunds sem við þekkjum svo vel

Sara er búsett í Dúbaí í Sameinuðu arabísku furstadæmunum og mátti því taka þátt í afrísku undankeppninni í ár.

Sara sýndi flott tilþrif á mótinu en hún varð á endanum að sætta sig við þriðja sætið. Aðeins sigurvegarinn fékk farseðil á heimsleikana í haust.

Snorri Barón Jónsson, umboðsmaður Söru, gerði upp helgina hennar á samskiptamiðlum og var ánægður með sína konu þótt að hún hafi ekki náð markmiði sínu.

„Sara snéri aftur í einstaklingskeppnina um helgina og stóð sig svo vel,“ skrifaði Snorri Barón.

Sara vann fjórar greinar, varð tvisvar í öðru sæti og einu sinni í þriðja sæti. Hún endaði síðan einu sinni í fimmta sætinu og einu í sinni í fjórtánda sæti.

„Við þurfum að bíða aðeins lengur eftir því að hún tryggi sér farseðilinn á heimsleikana. Stóru sigrar hennar um helgina voru að hún hljóp lengra og lyfti þyngra en hún hafði gert síðan hún sleit krossbandið árið 2021. Það voru heldur engin vandræði á skrokknum,“ skrifaði Snorri.

„Við sáum glitta í þá Söru Sigmundsdóttur sem við þekkjum öll. Þessa sem vann keppnir og komst á verðlaunapall heimsleikanna ár eftir ár. Hún hefur ekki litið betur út síðan 2020 og eina leiðin er upp á við eftir þetta,“ skrifaði Snorri.