Lausnamiðuð feril­skrá og að þora

Ímyndum okkur samt að við séum spennt fyrir umsókn um starf þar sem þó vantar eitthvað upp á í ferilskránni okkar miðað við hæfniskröfur í auglýsingu:

Við séum að uppfylla flest en ekki allt, eða líður þannig að okkur finnist eitthvað vanta.

Þegar sótt er um störf í einkageiranum eru þó ýmsar leiðir færar til að vega upp á móti þessu. Því þar er keppikeflið fyrst og fremst að ráða réttu manneskjuna í starfið. 

Hér eru nokkur ráð sem Indeed bendir á sem góðar leiðir til að draga fram kostina við að ráða okkur og hvers vegna við mögulega hentum best í tiltekið starf.

Það sem við þó höfum

Segjum sem svo að okkur vanti reynslu af sambærilegu starfi er um að gera að draga sérstaklega fram þá styrkleika sem við búum yfir og gætu einmitt hentað auglýsta starfinu sérstaklega vel. Á ensku eru þessir eiginleikar kallaðir transferable skills, en undir þá eiginleika flokkast alls kyns atriði, allt frá samskiptahæfni, seiglu, að vera lausnamiðaður eða sérþekking eins og verkefnastjórn, reynsla af því að koma fram, tímastjórnun og fleira. Stundum á það líka við að tilgreina sérstaklega félagsstörf þar sem hlutverkin okkar hafa verið þess eðlis að okkur finnst sú reynsla eiga vel við.

Að finna samherja

Annað sem væri gott að gera, er að leita til meðmælanda sem hefur trú á að þú getir vel sinnt því starfi sem verið er að auglýsa. Eða að ef við þekkjum eitthvað til innan fyrirtækisins, að fá einhvern þar til að benda á okkur.

Sumum finnst þetta þó of óþægilegt skref. Eitthvað sem fólk varla kann við að biðja annað fólk um að gera. Góð leið til að taka þá samtalið er að leita ráða, frekar en að biðja um eitthvað. Leyfa því þá að koma í ljós, hvort samtalið leiðist á þá braut að viðkomandi býðst til að hjálpa.

Að sanna mál sitt

Þá er það að sanna mál okkar; Hvers vegna erum við hæf í starfið þótt eitthvað vanti upp á samkvæmt auglýsingu? Höfum við gert eitthvað, áorkað eitthvað, lært eitthvað, þjálfað eitthvað, tekið þátt í einhverju, búið eitthvað til og svo framvegis, sem við getum vísað í til staðfestingar á að við séum álitlegir kandídatar.

Að passa vel við liðsheildina

Eitt atriði gæti síðan staðið upp úr fyrir þann sem er að ráða. Og það er ef þú sýnilega virðist smellpassa sem góður liðsmaður inn í liðsheildina. Að kynna sér vinnustaðamenningu fyrirtækisins og draga fram hvað í okkar fari og eiginleikum virðist eiga einstaklega vel við, gæti því verið enn eitt góða ráðið.

Það sem þú hefur aukalega

Mögulega býrð þú yfir einhverjum hæfileikum, reynslu eða þekkingu sem þú telur að gætu nýst vel í tilteknu starfi þótt það hafi ekki verið tiltekið sem krafa í auglýsingu. Ef svo er, endilega að nefna það sérstaklega.

Námsmaðurinn

Í sumum tilfellum snýst málið einfaldlega um það að fólk er ungt og nýútskrifað úr námi þannig að helst vantar upp á starfsreynsluna. En þá getur líka verið gott að draga eitthvað fram úr náminu okkar sem við teljum rökstyðja vel hvers vegna við erum góðir kandídatar í starfið. Til dæmis hvort við eigum auðvelt með að læra, vinna verkefni í hóp, séum að stefna á þennan geira og svo framvegis.

Lausnamiðuð ferilskrá

Í raun erum við að búa til ferilskrá sem sýnir í verki hversu framtakssöm og  lausnamiðuð við séum; Að þótt eitthvað smá vanti upp á miðað við hæfniskröfur í auglýsingu, þá séum við samt að sækja um og draga fram aðra kosti sem  rökstyðja hvers vegna viðkomandi vinnuveitandi ætti að gefa okkur tækifæri til samtals.