Enski boltinn

Hispurs­laus Amorim mun reynast Man United vel

Runólfur Trausti Þórhallsson skrifar
Amorim og De Ligt.
Amorim og De Ligt. Shaun Botterill/Getty Images

Miðvörðurinn Matthijs de Ligt hefur hrósað þjálfara sínum Ruben Amorim fyrir hispurslausa nálgun sína í samskiptum við leikmenn Manchester United og fjölmiðla.

Man United lauk loks skelfingar tímabili sínu með tveimur vináttuleikjum í Asíu. Amorim hefur verið mikið á milli tannanna á fólki síðan hann tók við liðinu á nýafstaðinni leiktíð enda gengi félagsins verið ömurlegt. Hinn 25 ára gamli De Ligt er hins vegar sannfærður um að félagið muni njóta góðs af nálgun Amorim til lengri tíma.

„Ég er frá Hollandi svo ég kann vel við þetta,“ sagði De Ligt einfaldlega en Hollendingar eru þekktir fyrir að vera einstaklega hreinskilnir að eðlisfari.

„Ég skil að fjölmiðlar séu í sjokki því þetta er ekki venjulegt. En ég held að það megi veri almenn ánægja með að loks sé einhver sem talar hreint út, segir það sem hann hugsar og segir satt.“

„Persónulega kann ég virkilega að meta samræður okkar. Það gefur mér þá tilfinningu að ég geti treyst honum og hann geti treyst mér. Ég hef verið með marga þjálfara og hann er einn af þeim þægilegustu til að tala við sem leikmaður.“

Hollenski landsliðsmaðurinn gekk í raðir Man United síðasta sumar. Hann hefur leikið fyrir Ajax, Juventus og Bayern München á ferli sínum.




Fleiri fréttir

Sjá meira


×