Staðan í hálfleik var jöfn, 18-18, en í seinni hálfleik var Kiel sterkari aðilinn og vann sex marka sigur, 37-31.
Bæði lið töpuðu naumlega í undanúrslitunum í gær; Melsungen fyrir Flensburg, 34-35, og Kiel fyrir Montpellier, 31-32.
Elvar Örn Jónsson og Arnar Freyr Arnarsson skoruðu báðir fimm mörk í leiknum í dag og voru næstmarkahæstir í liði Melsungen á eftir Florian Drosten. Emil Madsen átti stórleik fyrir Kiel og skoraði tólf mörk.
Melsungen er í harðri baráttu um þýska meistaratitilinn. Liðið er í 2. sæti þýsku úrvalsdeildarinnar með fimmtíu stig, jafn mörg og topplið Füchse Berlin. Bæði lið eiga fjóra leiki eftir. Magdeburg er í 3. sætinu með 47 stig en á fimm leiki eftir.
