Minnkuðu lúxuspinna en ekki eld­flaugina

 Á Facebook-grúppunni Vertu á verði - eftirlit með verðlagi birti Þór Skjaldberg í lok apríl mynd af íspinna frá Kjörís sem mældist tíu sentímetrar og skrifaði við hana: „Kjörís búin að minnka eldflaugarnar um ca 20%, gleymdu að lækka verðið.“

Töluverðar umræður sköpuðust um færsluna. Einhverjir tóku undir orð Þórs, aðrir hneyksluðust og svo bentu einhverjir á að samanburðinn vantaði, það vantaði að sjá hvað íspinninn hefði verið stór áður.

„Sæll Þór. Þessar flaugar eru 50 ml eins og þær hafa verið. Kær kveðja Elías starfsmaður Kjörís,“ skrifaði Elías Þór Þorvarðarson við færsluna. 

Flaugin haldist óbreytt í áraraðir

Valdimar Hafsteinsson, framkvæmdastjóri Kjöríss, ræddi þessar ásakanir um magnskerðingu í Reykjavík síðdegis í dag og sagði Kjörís hafa orðið varan við umræðuna.

Hvað segirðu við þessum ásökunum?

„Það er ekkert hæft í því, flaugin okkar er búin að vera eins og í sama magni í áraraðir. Hún á að vera 50 millílítrar ef allt er rétt. Það hefur verið svoleiðis og ekkert breytt í því,“ sagði Valdimar.

Manstu hvað hún er í sentímetrum talið?

„Nei, ég man það nú ekki nákvæmlega. Það er þá ekki nema það komi einstaka slys allt í einu sem veldur því. Það á ekki að koma fyrir,“ sagði hann.

Lúxupinnar minnkaðir

Valdimar viðurkenndi hins vegar að breytingar hefðu verið gerðar á Lúxuspinna Kjöríss.

„Við gerðum breytingu fyrir einu og hálfu ári síðan á honum. Þá minnkuðu við hann úr 90 í 80 millílítra. Það var nú svona tæknilegs eðlis þegar við keyptum nýja vél til að sinna okkar sem framleiðir í meira magni,“ sagði Valdimar.

Lækkaði verðið eitthvað í kjölfarið?

„Þetta var nú örugglega á þeim tíma sem verð var á mjög mikilli ferð í verðbólgutímanum. Ég man nú ekki hvort hann lækkaði en þetta er alltaf á svolítilli ferð hjá okkur,“ sagði hann.

Ísinn varð smjörkremslegur eftir saumaklúbb

Valdimar segir Kjörís fá mikið af ábendingu um alla mögulega hluti, bæði jákvæð skilaboð og um það sem betur megi fara.

„Í framleiðslu þar sem við erum að framleiða fleiri fleiri þúsund pinna á klukkutíma er möguleiki á að það slæðist einn og einn sem er ekki við þann standard sem við vijum. En þá fáum við oft ábendingar með það og bætum fólki það,“ sagði hann.

Valdimar man eftir fjölmörgum skemmtilegum ábendingum.

„Sérstaklega man ég nú eftir einni þegar var kvartað yfir vanillumjúkís og hann væri bara eins og smjörkrem. Þá hafði eiginkonan verði með saumaklúbb kvöldið áður, klárað ísinn og sett afganginn af smjörkreminu í dósina og endurnýtt hana. En eiginmaðurinn ætlaði að fá sér ís kvöldið eftir og var ósáttur við bragðið,“ sagði Valdimar.

Maðurinn hafi verið heldur sneypulegur þegar það uppgötvaðist að sögn Valdimars.