Að rjúfa vopna­hlé – 300 myrt á svip­stundu

Í nótt ákvað Ísrael að herða sókn sína og endanlega gera út um friðarsamkomulagið sem var í gildi frá 19.janúar síðastliðinn. Ísraelsmenn myrtu í nótt yfir 330 einstaklinga (sem er eins og íbúarfjöldinn á Flúðum) með sprengjuárásum, flest látinna eru konur og börn en árásunum var beint á íbúðarhús, skóla og opinberar byggingar sem höfðu verið breytt í flóttamannabúðir. Eftir tvo mánuði af „friði“ hefur Ísrael því ákveðið að hefja aftur sína stórsókn á Gaza. Ástæðan fyrir því að við skrifum „friði“ innan gæsalappa er að þrátt fyrir að vopnahléð hafi verið í gildi í tvo mánuði hefur Ísrael samt náð drepa að minnsta kosti 150 Palestínumenn á Gaza á „friðartímanum“.

Vopnahléð sem samið var, sem varla var hægt að kalla vopnahlé vegna sífelldra brota Ísraela á samningnum, átti að fela í sér að Ísrael drægi sig að hluta til baka frá Gaza en þess í stað hafa þeir lagt áherslu á að eyðileggja, sprengja og myrða Palestínumenn á Vesturbakkanum á „friðartímanum“. Þar hafa yfir 90 Palestínumenn hafa verið myrtir, þar af minnst 18 börn, og yfir 40 þúsund eru á flótta á Vesturbakkanum. Sem þýðir að á „friðartímanum“ hefur Ísrael myrt yfir 240 palestínumenn.

Blóðugar árásir næturinnar á Gaza koma svo í kjölfar þess að Ísrael hefur markvisst verið að svelta börn og fullorðna á svæðinu auk þess að loka á rafmagn og á allan innflutning á neyðaraðstoð, vatn, lyf og aðrar nauðsynjavörur. Staðan á Gaza er alvarlegri en við getum ímyndað okkur og nú sprengir Ísrael sveltandi börn sem hírast í tjöldum því heimili þeirra voru lögð í rúst. Þvingaðir brottflutningar, áform um þjóðernishreinsanir, þjóðarmorð og landtöku á Gaza eru rædd fyrir opnum dyrum í Ísrael og af Bandaríkjaforseta. Yfirlýst markmið Ísraels er að útrýma Palestínu.

Árásirnar eru gerðar með fullum stuðning Bandaríkjanna, enda voru þau fljót að kenna Hamas um að brjóta vopnahléð. Hinsvegar þegar litið er á tímalínuna þá stenst það enga skoðun. Ísrael undirritaði vopnahlésamning í janúar sem fól í sér þrjú stig og á sama tíma og Hamas hefur staðið við vopnahléið þá hefur Ísrael neitað að fylgja því, haldið áfram að myrða Palestínumenn, svelta og algjörlega hafna því að standa við skilmála vopnahlésins sem að felur í sér yfirfærslu á stig tvö og síðar meir á stig þrjú.

Ísrael með stuðning Bandaríkjana ætla ekki að virða rétt Palestínumann til lífs og mannréttinda. Ísrael með stuðning Bandaríkjana ætla að útrýma Palestínu og tryggja yfirráð og sín réttindi á svæðinu. Stríðsglæpirnir halda áfram án aðgerða alþjóðasamfélagsins og alþjóðalagakerfið molnar á meðan. Ísrael hefur hunsað allar ályktanir SÞ, alla bráðabirgðaúrskurði alþjóðadómstólsins og öll áköll alþjóðasamfélagsins. Í vikunni gaf Mannréttindaráð Sameinuðu þjóðanna út skýrslu sem sýnir að Ísrael notar kynbundið ofbeldi og kynferðisofbeldi af ásetningi til að kúga palestínsku þjóðina, og kemst skýrslan að þeirri niðurstöðu að Ísrael hafi gerist sekt um stríðsglæpi, glæpi gegn mannkyni og þjóðarmorð. Ísland á sæti í Mannréttindaráði SÞ og ber skylda til að fylgja niðurstöðum skýrslunnar eftir með aðgerðum.

Það er með ólíkindum að horfa á alþjóðasamfélagið jafnt lamað og það er. Þrátt fyrir handtökubeiðni á Netanyahu, skýrslur Sameinuðu Þjóðanna og opinberar yfirlýsingar Bandaríkjana og Ísrael um að þjóðernishreinsa Palestínu, þá gerist ekkert!

Ísrael er í gjöreyðingarherferð og það eina sem getur stöðvað það eru skýrar aðgerðir alþjóðasamfélagsins. Orðin ein munu ekki stöðva þjóðarmorðið.

Að lokum má því spyrja, ætla Þorgerður Katrín og Kristrún Frostadóttir að standa aðgerðalausar hjá meðan Ísrael myrðir saklausa palestínska borgara á hrottalegan hátt, eða ætla þær loksins að standa með mannréttindum og berjast fyrir því að Ísrael verður látið taka ábyrgð á þeim grimmdarverkum sem framkvæmd eru daglega? Ætlar ríkisstjórn Íslands loksins að taka málið alvarlega, eins og meirihluti þjóðarinnar vill og kaus hana meðal annars til? Ætlar Kristrún Frostadóttir forsætisráðherra loks að eiga frumkvæði að samtali við Norðurlöndin um viðskiptaþvinganir á Ísrael, eins og hún sjálf átti hugmynd að áður en hún varð forsætisráðherra? Eða ætlar hún að vera þekkt sem forsætisráðherrann sem sat hjá á meðan börn voru sprengd í tætlur?

Salvör er sviðshöfundur og Yousef er hjúkrunarfræðingur.