„Ég lét þetta ekki brjóta mig niður og hafa á­hrif á mig“

„Þetta er risalið. Ég held að hópurinn sem Malmö býr yfir í dag sé sterkasti hópurinn í Skandinavíu,“ segir Arnór. „Þeir eiga að vinna sænsku deildina og bikarinn. Það er pressa sem fylgir því og það heillar. Að fara keppa um titla og spila í Evrópu.“

Áhugi var á kröftum Arnórs víðs vegar að, meðal annars frá Svíþjóð og Danmörku.

„En eftir að ég talaði við menn hjá Malmö þá var þetta engin spurning.“

Vænn bónus

Og af fréttum í Svíþjóð að dæma er Arnór að fá væna summu fyrir það eitt að skrifa undir þriggja ára samning hjá félaginu. Herma heimildir Vísis að sú upphæð sé enn hærri en haldið hefur verið fram í sænskum miðlum og nemi hátt upp í tvö hundruð milljónum íslenskra króna.

Peningarnir eru hins vegar ekki það sem skiptir Arnór mestu máli á þessu stigi ferilsins. Hann hefur átt erfitt uppdráttar mánuðum saman eftir langvinn veikindi og erfið meiðsli í þokkabót. Nú er hann hins vegar heill heilsu, klár í að láta til sín taka.

„Undanfarið ár hefur verið mér erfitt. Mikið af meiðslum og veikindum. Ég vil bara fara út á völl og njóta þess að spila fyrir lið eins og Malmö þar sem að við eigum að fara í alla leiki og vinna þá. Það verður bara geggjað.

Auðvitað verður mikil pressa í ljósi þess að þetta eru stór skipti og maður finnur strax að það verður pressa, bæði á mér en einnig liðinu. Ég þrífst á pressunni, það er eitthvað sem ýtir undir að ég vil gera enn betur.“

Rætt var við Arnór í Sportpakkanum á Stöð 2 í gærkvöld:

Var ekki að fara velja neitt annað en Malmö

Arnór kannast vel við sig í sænsku deildinni eftir tíma þar hjá Norrköping. Hann ræddi við íslenskan yfirmann knattspyrnumála félagsins, Magna Fannberg, eftir að leiðir skildu við Blackburn en eins og hann segir sjálfur frá hér fyrir ofan gat hann ekki sagt nei við sænsku meistarana í Malmö.

„Tíminn sem ég varði hjá Norrköping verður mér alltaf kær sem og stuðningsmenn félagsins. En á þessum tímapunkti áttum við Magni bara gott samtal og þetta var bara ekki að fara gerast. Ég var ekki að fara velja neitt annað þegar að Malmö kom inn í myndina. Erfitt og ekki erfitt. Svona er bara fótboltinn.“

Lét þetta ekki brjóta sig niður

Að baki stormasöm endalok hjá Blackburn þar sem Arnór var settur út í kuldann, skömmu áður en hann varð aftur heill heilsu.

„Óvænt staða því samtölin sem ég var búinn að eiga við þjálfarann og stjórnarmenn áður en að þetta gerist voru bara mjög góð og fyrir mig var það spennandi tilhugsun að snúa aftur á völlinn og hjálpa liðinu að komast upp í umspilssæti. En á sama tíma, þegar að ég fékk þessar fréttir, var ég fljótur að kúpla mig inn á að eitthvað nýtt og gott kæmi út úr þessu. Ég lét þetta ekki brjóta mig niður og hafa áhrif á mig því ég vissi að þetta hafði ekkert að gera með það hversu góður í fótbolta ég væri, heldur miklu frekar viðskiptaleg- og pólitískt eðlis. Skrítnir dagar en á sama tíma er ég mjög sáttur með hver staðan er í dag.“

Skömmu eftir að samningi Arnórs við Blackburn var rift hoppaði þjálfari liðsins, John Eustace, frá borði og tók við Derby County.

„Það kom mér svo sem ekkert á óvart vitandi það hvernig hlutirnir hafa verið að þróast þarna án þess að segja of mikið. En auðvitað leiðinlegt þar sem að félagið er í mjög góðri stöðu í 5.sæti deildarinnar núna.“

Engin endastöð

Arnór naut tímans á Englandi og útilokar ekki að snúa aftur þangað einn daginn, draumur hans er enn að spila í ensku úrvalsdeildinni en nú einbeitir hann sér að verkefninu framundan með Malmö.

„Ég er 25 ára og á nóg eftir. Er að fara inn í þessi svokölluðu bestu ár á mínum ferli í boltanum. Það er engin spurning að auðvitað dreymi manni um að spila á hæsta gæðastigi boltans. Nú er ég kominn í stóran klúbb hjá Malmö og veit að það fylgjast mörg augu með manni þar. Þó ég muni náttúrulega bara vera einbeittur á verkefnið framundan hjá Malmö þá sé ég það félag ekki sem einhverja endastöð.“

Ungur að árum en margt óvænt hefur átt sér stað á ferli Arnórs, bæði er hann var leikmaður CSKA Moskvu þegar að Rússar réðust inn í Úkraínu og nú hjá Blackburn þegar að á örskotstundu staða hans breyttist.

„Hlutirnir sem maður hefur gengið í gegnum á stuttum ferli kenna manni mikið. Það er það sem hefur mótað mig, bæði sem manneskju og leikmann. Það er ekkert öruggt í þessum heimi, þessi heimur getur verið harður og geðveikt skemmtilegur. Það er stutt á milli í þessu, maður þarf bara að muna að njóta hvers einasta dags.“