Hélt hann hefði verið étinn af hval

Adrián Simancas var úti á kajak með föður sínum síðustu helgi nærri Magellansundi í Síle þegar hnúfubakur kom skyndilega upp á yfirborðið og tók Adrían og kajakinn hans með sér niður í nokkrar sekúndur, og sleppti honum svo.

Dell, faðir Adrían, var í aðeins nokkurra metra fjarlægð og náði atvikinu á myndband.

„Vertu rólegur, vertu rólegur,“ má heyra Dell segja í myndbandinu eftir að hvalurinn sleppti syni hans úr munni sínum.

„Ég hélt ég væri dauður,“ er haft eftir Adrían í viðtali við AP en hægt er að horfa á viðtalið að neðan. 

„Ég hélt hann hefði étið mig, að hann hefði gleypt mig,“ segir hann. 

Hann segir þessar nokkru sekúndur þar sem hann var í gini hvalsins hrikalegar en að hann hafi ekki orðið raunverulega hræddur fyrr en hann kom aftur upp á yfirborðið. Þá hafi hann verið hræddur um að hvalurinn myndi meiða föður hans eða að hann myndi hverfa ofan í kalt vatnið.

Hann náði þó að synda til föður síns og fékk svo aðstoð stuttu síðar. Báðir komust þeir svo heilir á haldi í land aftur.

Magellansund er í um 2.600 kílómetra fjarlægð frá höfuðborg Síle, Santíagó, og er vinsæll ferðamannastaður. Í frétt Guardian segir að þó svo að árásir hvala á mannfólk séu afar sjaldgæfar í Síle hafi fleiri hvalir drepist síðustu ár vegna árekstra við flutningaskip og æ algengara sé að þeir strandi.