Auknar líkur á skriðum á Vest­fjörðum, Vestur- og Suður­landi

Þetta kemur fram á bloggsíðu Veðurstofunnar um ofanflóð. Þar segir að fram á fimmtudag sé spáð suðlægum áttum með hlýindum og rigningu í flestum landshlutum, en mögulega snjókomu í allra hæstu fjöllum og á jöklum landsins. 

„Búast má við að úrkoman verði hvað mest á sunnan- og vestanverðu landinu. Þá fylgir úrkomunni hlýtt loft og er hiti yfir frostmarki í nær öllum landshlutum. Því má gera ráð fyrir að frost fari úr jörðu. Snjó hefur tekið upp víðast hvar á landinu en enn er snjór til fjalla og í giljum,“ segir í færslunni.

Þótt ekki sé búist við óvenju ákafri rigningu eða miklum hlýindum geti langvarandi væg hláka aukið líkur á skriðuföllum.

„Jarðvegurinn getur þolað mikið vatnsmagn, en þegar rignir, frost fer úr jörðu og snjóa leysir safnast sífellt meira vatn fyrir og jarðvegurinn getur orðið óstöðugur. Þá þarf úrkomumagn ekki að vera umtalsvert til að skriður geti fallið, segir einnig.

Uppsöfnuð úrkoma og afrennsli

Uppsöfnuð úrkoma eigi að ná háum gildum á næstu þremur dögum og því varar Veðurstofan við auknum líkum á grjóthruni og skriðum á þeim svæðum þar sem úrkoman er mest. Slíkar veðuraðstæður geti valdið krapaflóðum þar sem snjór er enn í giljum og farvegum.

Úrkoman og hlýindin valdi auknu afrennsli, sér í lagi á Suður- og Vesturlandi og sunnanverðum Vestfjörðum, eins og sjá má á myndinni að neðan. 

„Margar ár eru háar eftir vatnavexti helgarinnar og búast má við enn frekari vatnavöxtum í ám og lækjum næstu daga,“ segir í tilkynningunni.