Veðurviðvaranir um allt land vegna hvassviðris og hláku

Magnús Jochum Pálsson skrifar 12. janúar 2025 08:37

Gangandi vegfarendur verða að passa sig á hálkunni í dag. Hún er lúmsk. Vonandi verður hún farin í vikunni ef það hlýnar áfram. vísir/vilhelm

Allmikið lægðardrag hreyfist norðaustur yfir landið í dag og veldur suðaustanstrekkingi með rigningu og hlýindum, einkum á suðaustanverðu landinu. Veðurviðvaranir vegna hvassviðris og hláku eru í gildi um allt land og er búist við talsverðri leysingu.

Þetta kemur fram í hugleiðingum veðurfræðings á vef Veðurstofunnar. Þar er einnig vakin athygli vegfarenda og gangandi á því að hálkublettir leynast víða.

Rigning víða um land og suðaustan þrettán til tuttugu metrar á sekúndu. Hægara og úrkomulítið norðaustanlands. Lægir og dregur úr vætu með morgninum, en áfram rigning austanlands fram eftir kvöldi. Veðrið fer hlýnandi, hiti þrjú til ellefu stig að deginum, en kólnar talsvert í nótt og sums staðar verður vægt frost.

Í kjölfarið muni lægðirnar koma hver af annarri með tilheyrandi vætu og hlýindum. Það snúist líklega í norðanátt þegar líður á vikuna og kólni svo talsvert með éljum eða snjókomu, einkum norðanlands.

Veðurhorfur á landinu næstu daga

Á mánudag: Suðlæg átt, 8-15 m/s og allvíða rigning eða súld, en skúrir eftir hádegi. Styttir upp á norðaustanverðu landinu um kvöldið. Hlýnandi veður og hiti tvö til átta stig seinnipartinn.

Á þriðjudag: Suðlæg átt 5-15 m/s, hvassast austast. Rigning, einkum syðra, en úrkomulítið norðaustanlands. Hiti þrjú til átta stig.

Á miðvikudag: Allhvöss eða hvöss suðlæg átt, víða rigning og milt veður, en gengur í noranhvassviðri með snjókomu eða éljum og kólnandi veðri vestantil síðdegis.

Á fimmtudag: Hægir vindar og úrkomulítið, gengur í stífa norðanátt með snjókomu austantil um kvöldið. Talsvert frost víða um land.

Á föstudag: Norðaustlæg átt og él á víð og dreif, en hvessir og snjóar víða um kvöldið. Áfram kalt í veðri.

Á laugardag: Útlit fyrir ákveðna norðaustanátt með snjókomu eða éljagangi og svölu veðri.

Veður