Drátturinn hefst klukkan 11 og verður í beinni útsendingu á Stöð 2 Sport 2 og á Vísi.
Drátturinn verður svolítið öðruvísi en vanalega því það er ekki enn nákvæmlega ljóst hvernig liðin raðast í efsta styrkleikaflokki. Það á nefnilega enn eftir að klára síðustu leiktíð af Þjóðadeildinni, sem hefur áhrif á undankeppnina.
Dregið verður í tólf riðla – sex með fjórum liðum og sex með fimm liðum. Efsta lið hvers riðils kemst á HM en liðin sem enda í 2. sæti fara í umspil í mars 2026, ásamt fjórum sigurvegurum riðla úr Þjóðadeildinni (Ísland vann ekki sinn riðil).
Gætu þurft að bíða fram í mars eftir toppliði
Áður hefur verið fullyrt, meðal annars af KSÍ og hér á Vísi, að Ísland yrði í fjögurra liða vegna Þjóðadeildarumspils við Kósovó í mars, en eftir að FIFA breytti reglum um dráttinn í lok nóvember eru minni háttar líkur á að Ísland endi í fimm liða riðli. Þá myndi Ísland hefja undankeppnina í júní, en annars í fjögurra liða riðli í september.
Liðin sem komust í 8-liða úrslit Þjóðadeildarinnar verða einmitt einnig upptekin í mars, og liðin fjögur sem komast þaðan í undanúrslit Þjóðadeildarinnar í júní verða að vera í fjögurra liða riðlum í undankeppni HM.
Þess vegna verða mótherjar Íslands úr efsta flokki mögulega titlaðir sem sigurlið úr einu af einvígunum í 8-liða úrslitum Þjóðadeildar (Holland - Spánn, Króatía - Frakkland, Danmörk - Portúgal, Ítalía - Þýskaland). Það myndi þá ekki ráðast alveg fyrr en eftir 8-liða úrslitin í mars hver besti mótherjinn í riðli Íslands yrði.
Ísland má ekki mæta Færeyjum
Í drættinum í dag gilda einnig ákveðnir skilmálar til að forðast að mikið sé um löng ferðalög innan sama riðils, og þá eru Ísland og Færeyjar titluð af UEFA sem „vetrarstaðir“, þar sem mesta hættan er talin á of miklu vetrarveðri til að spila fótbolta, og geta ekki dregist í sama riðil.
Ísland mun mæta einu liði úr hverjum styrkleikaflokki, utan fimmta flokks ef liðið verður í fjögurra liða riðli eins og líklegast er. Hér að neðan má sjá flokkana:
Styrkleikaflokkarnir
Styrkleikaflokkur 1
- Sigurlið Frakkland-Króatía
- Sigurlið Spánn-Holland
- Sigurlið Portúgal-Danmörk
- Sigurlið Ítalía-Þýskaland
- Taplið Frakkland-Króatía
- Taplið Spánn-Holland
- Taplið Portúgal-Danmörk
- Taplið Ítalía-Þýskaland
- Belgía
- Austurríki
- England
- Sviss
Styrkleikaflokkur 2
- Úkraína
- Svíþjóð
- Tyrkland
- Wales
- Ungverjaland
- Serbía
- Pólland
- Rúmenía
- Grikkland
- Slóvakía
- Tékkland
- Noregur
Styrkleikaflokkur 3
- Skotland
- Slóvenía
- Írland
- Albanía
- Norður-Makedónía
- Georgía
- Finnland
- Ísland
- Norður-Írland
- Svartfjallaland
- Bosnía
- Ísrael
Styrkleikaflokkur 4
- Búlgaría
- Lúxemborg
- Hvíta-Rússland
- Kovósó
- Armenía
- Kasakstan
- Aserbaídsjan
- Eistland
- Kýpur
- Færeyjar
- Lettland
- Litháen
Styrkleikaflokkur 5
- Moldóva
- Malta
- Andorra
- Gíbraltar
- Liechtenstein
- San Marínó