Sjáðu Andra Rúnar skjóta Fram í kaf

Andri Rúnar kom Vestra yfir á 21. mínútu eftir sendingu frá Benedikt Warén en Alex Freyr Elísson jafnaði fyrir Fram á 34. mínútu.

Á 44. mínútu vann Andri Rúnar boltann og sendi á Benedikt sem kom Vestra aftur yfir. Í uppbótartíma fyrri hálfleiks skoraði Andri Rúnar annað mark sitt og þriðja mark gestanna þegar hann vippaði yfir Ólaf Íshólm Ólafsson úr ómögulegu færi.

Á 54. mínútu fullkomnaði Andri Rúnar þrennuna þegar hann skoraði eftir góðan undirbúning Benedikts.

Kennie Chopart lagaði stöðuna fyrir Fram með marki beint úr aukaspyrnu á 67. mínútu en nær komust heimamenn ekki. Lokatölur 2-4, Vestra í vil.

Andri Rúnar hefur skorað í öllum þremur leikjum Vestra í úrslitakeppninni, alls fimm mörk. Hann hefur alls skorað átta mörk í sumar.

Vestri er í 10. sæti deildarinnar með 25 stig en Fram í 8. sætinu með þrjátíu stig. Framarar hafa tapað síðustu tveimur leikjum sínum, 11-3 samanlagt.

Mörkin úr leiknum á Lambhagavellinum má sjá í spilaranum hér fyrir ofan.