Á­hrifa­mikil og sláandi yfir­lýsing frá bróður Lazars heitins Dukic

Lazar lést fyrir fjórum vikum síðan þegar hann drukknaði í fyrstu grein heimsleikanna. Lazar hvarf í vatnið rétt við markið og enginn tók eftir því fyrr en það var of seint.

Luka skrifaði langa, áhrifamikla og sláandi yfirlýsingu þar sem hann fór yfir allt það sem gekk á þennan dag og sem á þeim hrikalega erfiðu dögum sem tóku við í framhaldinu.

Það þarf ekki að koma neinum á óvart að pistill Luka er fullur af svekkelsi, sársauka og sorg.

„Lazzar var allt fyrir mér. Hann var bróðir minn, besti vinur minn, átrúnaðargoðið mitt, keppinautur, æfingafélagi og einhver sem ég fór til þegar ég vissi ekki hvað ég átti að gera. Hann var líka sá sem ég fór alltaf fyrst til með góðu fréttirnar,“ skrifaði Luka Đukic.

Vildi að hans hlið kæmi fram

Luka segist ekki skulda neinum útskýringu eða að það hafi verið einhver pressa á honum að gefa frá sér yfirlýsingu sem þessa. Hann vildi bara að hans hlið kæmi fram í dagsljósið.

Luka sagði frá því að hann og Lazar höfðu prófað fyrstu greinina í aðdraganda leikanna. Þeir hlupu leiðina og syntu í vatninu. Hann sagði líka að bræðurnir hafði ætlað að halda hópinn og passa upp á hvorn annan í sundinu.

Fór að leita að bróður sínum

„Þegar Lazar fór fyrst í vatnið þá fór hann ekki á réttum stað sem kostaði hann nokkrar sekúndur. Við fórum því í vatnið á sama tíma en það var í síðasta skiptið sem ég sá hann,“ skrifaði Luka.

Luka lýsti því líka hvernig hann kláraði greinina og fór síðan að leita að bróður sínum. Hann hitti síðan kærustu sína sem var í miklu ójafnvægi og hrædd af því að henni fannst hún sjá eitthvað í útsendingunni.

Fyrst rangar fréttir og svo engar fréttir

Luka segist þá hafa farið til íþróttastjórans Dave Castro og spurt hvar bróður hans væri. Castro svaraði: „Hann var númer 27 ekki satt? Þeir sögðu að tölvukubburinn hans hafi farið yfir marklínuna.“

Luka létti strax við þetta en svo kom starfsmaður CrossFit til hans og sagði að tveir hefðu ekki skilað sér í mark. Hann þurfti síðan að bíða lengi án þess að fá neinar fréttir.

Luka áttaði sig seinna á því að yfirmenn CrossFit voru þá að bíða eftir því að viðbraðgsaðilar myndu finna lík Lazars. Luka bar seinna kennsl á bróður sinn á mynd.

Enginn reyndi að bjarga honum

„Það sem ég sá seinna á myndbandinu var að það var enginn að reyna að bjarga Lazar. Hann var að berjast fyrir lífi sínu og fór niður rétt hjá tveimur sjálfboðaliðum sem sáu hann ekki,“ skrifaði Luka.

Luka fór siðan aftur á hótelið enn í sundskýlunni. Hann fékk þá að vita að Castro vildi tala við hann. Castro og Nicole Carroll, annar yfirmaður hjá CrossFit, komu þá inn í herbergið og sögðust vilja klára heimsleikana til minningar um Lazar.

„Þú ræður þessu hvort sem er ekki“

Luka var í sjokki og sagði við Castro að Castro ætti ekki að ráða því hvað yrði gert. Castro á þá að hafa svarað: „Þú ræður þessu hvort sem er ekki.“

„Það var ekki borin virðing fyrir minni ósk og eftir það talaði ég ekki við neinn frá höfuðstöðvunum,“ skrifaði Luka. Castro vildi tala við hann á laugardagskvöldinu en Luka neitaði honum um það.

Það má lesa allan pistilinn hér fyrir neðan. Það þarf að fletta til að lesa hann allan.