Enn ó­víst hvort Mbappé geti spilað gegn Hollendingum

Mbappé nefbrotnaði í 1-0 sigri Frakka gegn Austurríki í fyrsta leik liðanna á EM síðastliðinn mánudag. Hann lenti þá í samstuði við Kevin Danso og var í kjölfarið fluttur á sjúkrahús í Düsseldorf þar sem staðfest var að hann hafi nefbrotnað.

Sem betur fer fyrir franska liðið, og Mbappé sjálfan, þarf leikmaðurinn ekki á aðgerð að halda. Slík aðgerð hefði getað þýtt að framherjinn myndi missa af öllu mótinu.

Enn er þó óvíst hvort Mbappé muni geta tekið þátt í næsta leik Frakka þegar liðið mætir Hollandi á föstudaginn. Frakkland og Holland unnu bæði sína leiki í fyrstu umferð riðlakeppninnar og berjast því um efsta sæti D-riðils.

Franska knattspyrnusambandið hefur þó sagt að sambandið muni uppfæra stuðningsmenn liðsins um stöðu Mbappé í dag, miðvikudag. Þá hefur franska sambandið einnig gefið út að sérstök hlífðargríma verði útbúin fyrir leikmanninn.