Fjöl­skylda Schumacher vann gervi­greindar­málið

Die Aktuelle sló því upp á síðasta ári að það væri með fyrsta viðtalið við Michael Schumacher eftir skíðaslysið hans fyrir meira en áratug síðan.

Þýska blaðið notaði hins vegar gervigreind til þess að taka þetta ímyndaða viðtal sitt við Michael Schumacher. Fjölskyldan varð mjög reið vegna þessa og leitaði réttar síns fyrir dómstólum.

Schumacher hefur ekki sést opinberlega síðan hann datt á stein í skíðabrekku í Ölpunum árið 2013. Hann hefur aldrei tjáð sig opinberlega og fjölskyldan hefur ekki sagt frá því hvernig hann hefur það.

Fjölskylda Schumacher fékk tvö hundruð þúsund evrur í skaðabætur frá Die Aktuelle eða rúmar 35 milljónir í íslenskum krónum.

Die Aktuelle hafði áður bæði beðið fjölskylduna afsökunar og rekið ritstjórann.

Schumacher varð á sínum tíma sjöfaldur meistari í formúlu eitt og var þegar hann var upp á sitt besta einn frægasti íþróttamaður í heimi.