Dagar Workplace eru taldir

Workplace, sem kalla mætti Vinnustaðinn á íslensku, er samskiptamiðill ætlaður til notkunar innan fyrirtækja. Forritið gerir starfsmönnum kleift að deila skjölum og öðru vinnutengdu sín á milli ásamt því að virka sem samfélagsmiðill innan fyrirtækja. 

Til að mynda nýta samstarfsmenn blaðamanns Workplace til þess að athuga hvað er í hádegismatinn og hvort hleðslustöð fyrir rafbíla sé að losna.

Gervigreind muni bylta vinnu

Í frétt CBS segir að Meta hafi sagt í tilkynningu að stjórnendur félagsins hafi trú á því að gervigreind félagsins og Metaversa, sýndarveruleikaheimur, muni bylta því hvernig vinna er unnin af hendi í framtíðinni. 

Því muni félagið hægt og rólega loka Workplace og einbeita sér að öðrum verkefnum. Fyrirtæki sem eru þegar í viðskiptum muni geta notað Workplace til 31. ágúst á næsta ári og verði eftir það boðið að færa viðskipti sín til Workvivo, sem er sambærileg vara úr smiðju Zoom. Gögn fyrirtækja á Workplace verði þó aðgengileg í eitt ár til.