„Ég held að Lands­kjör­stjórn þurfi að endur­skoða sína lög­fræði­þekkingu“

Greint var frá því í morgun að tvö forsetaframboð af þeim þrettán sem skiluðu inn meðmælalistum hefðu verið úrskurðuð ógild. Áðurnefndur Viktor og Kári Vilmundarson Hansen verða ekki á kjörseðlinum í komandi forsetakosningum.

Viktor segist hafa sent úrskurðarnefnd kosningamála tilkynningu um að hann ætli að kæra niðurstöðu landskjörstjórnar og þau úrskurðarorð sem hann fékk. Berglind Svavarsdóttir, formaður úrskurðarnefndar kosningamála staðfestir í samtali við fréttastofu að kæran hafi borist.

Í tilkynningu sem Viktor hefur sent fjölmiðlum segist hann hafa þurft að lesa úrskurð landskjörstjórnar „í kyrrþey til þess að átta mig á innihaldinu.”

Þar segist hann hafa skilað inn á annað þúsund undirskriftum á blöðum, en þær allar úrskurðaðar ógildar. Að sögn Viktors er ástæðan sú að meðmælendur hans rituðu nafn, kennitölu og dagsetningu, þegar hið rétta væri að rita nafn, kennitölu, og lögheimili.

Viktor hafi þó endað með 69 gildar undirskriftir, en þær voru allar rafrænar.

„Stjórnarskráin gefur fyrirmæli um kjörgengi til forseta, meðal annars um lágmarksaldur og meðmæli minnst 1500 kosningabærra manna. Ég taldi mig hafa uppfyllt hvort skilyrði. Fleira segir stjórnarskráin ekki en setur þann varnagla að með lögum megi setja nánari reglur. Það var gert árið 1945 með lögum um framboð og kjör til forseta Íslands en Alþingi hefur síðan fellt þessi lög úr gildi en setti engin önnur lög í staðin,“ segir Viktor í tilkynningu sinni og segist því telja að listarnir sem hann skilaði inn hafi uppfyllt öll skilyrði.

„Ég tel því að meðmælalistar mínir uppfylli öll skilyrði sem stjórnarskrá lýðveldisins setur um kjörgengi til forseta,“ segir hann. 

„Í úrskurði Landskjörstjórnar segir að sömu reglur gildi um forsetakjör og gilda um alþingis- og sveitastjórnarkjör en ég hafna því enda segir í ákvæðinu sem Landskjörstjórn vísar í að ráðherra setur reglugerð um form og efni framboðslista.“

Viktor gefur lítið fyrir lögfræðiþekkingu Landskjörstjórnar og vill meina að stjórnarskráin hafi verið beygð í úrskurði hennar.

„Ég held að Landskjörstjórn þurfi að endurskoða sína lögfræðiþekkingu ef þau telja að stjórnarskráin verði beygð með þeim hætti sem hún gerir í úrskurði sínum,“ segir hann. „Það er einfaldlega lagaþurrð hvað lögheimilisskilyrðið varðar og þess vegna á stjórnarskráin að gilda og meðmælalistar mínir teknir fullgildir.“

Þar að auki segir Viktor að Landskjörstjórn hafi ekki gefið honum færi á að lagfæra sína meðmælalista hans, en aðrir frambjóðendur fengu það hins vegar. Þar segir Viktor að kjörstjórnin hafi brotið gróflega gegn jafnræðisreglu.

Fékk ekki að lagfæra listana

„Það má einnig geta þess að Landskjörstjórn braut gróflega gegn jafnræðisreglu stjórnarskrárinnar þegar nokkrir frambjóðendur fengu helgina í að lagfæra sína undirskriftarlista og safna fleirum en aldrei var haft samband við mig varðandi nein vandamál á mínum listum.“

Hér má sjá viðtal við Viktor frá því á föstudag þegar hann skilaði inn listunum.

Kristín Edwald, formaður Landskjörstjórnar, tjáði sig um þau tvö framboð sem hefðu verið dæmd ógild í morgun. Hún sagði annað framboðið ekki hafa uppfyllt skilyrði laga um meðmælendalista, heimilisföng og kennitölur meðmælenda hafi skort og verulega hafi vantað upp á fjölda meðmælenda.

Hitt framboðið hafi aðeins skilað inn níu undirskriftum meðmælenda.

Fréttin hefur verið uppfærð. Í upprunalegri útgáfu hennar sagði að ekkert kæmi fram í tilkynningu Viktors um hvort hann hyggðist kæra úrskurð Landskjörstjórnar. Hann sendi í kjölfarið annað skeyti þar sem hann segist hafa gert úrskurðarnefnd kosningamála viðvart um að hann hyggist kæra niðurstöðuna.