Tugir létust í elds­voða á skemmti­stað

Davut Gül talsmaður yfirvalda í Istanbul sagði eldsupptök ekki liggja fyrir. Hinir látnu eru að hans sögn taldir tengjast framkvæmdum á skemmtistaðnum, sem stóðu yfir þegar eldurinn kom upp skömmu eftir hádegi í dag. 

Lögreglan í Istanbul hefur gefið út handtökuskipun á hendur átta manns í þágu rannsóknar málsins, þar á meðal á framkvæmdastjóra skemmtistaðarins og umsjónarmann viðgerðanna. Þrír þeirra hafa þegar verið handteknir.

Mikinn reyk lagði frá inngangi skemmtistaðarins, sem er tveimur hæðum undir jarðhæð, þegar slökkvilið bar að garði. Fjöldi látinna hefur hækkað eftir því sem liðið hefur á daginn.

Ekrem Imamoglu borgarstjóri Istanbul sagði skemmtistaðinn ekki hafa sótt um leyfi fyrir þeim framkvæmdum sem fóru fram í kjallaranum. Hann vottaði ættingjum hinna látnu samúð í færslu á samfélagsmiðlinum X, áður Twitter, í dag.