Albert dró veru­lega úr á­hyggjum UEFA

Þökk sé þrennu og stórleik Alberts Guðmundssonar þá vann Ísland 4-1 sigur gegn Ísrael í Búdapest í gærkvöld, í undanúrslitum EM-umspilsins, og tryggði sér úrslitaleik við Úkraínu í Póllandi á þriðjudaginn.

Íþróttamiðillinn virti ESPN hefur eftir heimildamanni hjá UEFA (Knattspyrnusambandi Evrópu) að hefði Ísrael komist inn á EM þá hefði það „gjörbreytt flækjustiginu varðandi skipulag öryggisgæslu“, í ljósi stríðsins á Gasa-svæðinu. Ísland hafi hins vegar séð til þess að þessar áhyggjur plagi menn ekki lengur í höfuðstöðvum UEFA.

Aflýstu leiknum við Bosníu

Til stóð að tapliðin í undanúrslitum EM-umspilsins myndu mætast á þriðjudaginn í vináttulandsleik. Þannig hefði Bosnía tekið á móti Ísrael í vináttulandsleik í Sarajevo.

Eftir úrslit leikjanna í gær og vegna ótryggs ástands var hins vegar ákveðið að aflýsa þeim leik, segir í frétt One í Ísrael. Shino Zoertz, formaður ísraelska knattspyrnusambandsins, staðfesti þetta:

„Vegna þrúgandi aðstæðna þá hafði UEFA samband við mig eftir að úrslitin lágu fyrir og spurði hvort við værum til í að hætta við leikinn við Bosníu, sem var í raun orðinn óþarfur fyrir bæði lið. Það er leitt því ég er viss um að bosníska sambandið hefði orðið góður gestgjafi en vegna aðstæðna þá samþykkti ég þetta.“

Í heimaleikjabanni en mega spila

Leikur Íslands og Ísraels í gærkvöld fór fram í Ungverjalandi en ekki í Ísrael, vegna stríðsins, en ísraelska landsliðið hefur fengið að hafa Búdapest sem sitt annað heimili frá því að stríðið hófst í október. UEFA hefur bannað öllum liðum Ísraels, bæði félags- og landsliðum, að spila í Ísrael og var leikurinn við Ísland þriðji „heimaleikur“ þjóðarinnar í ungversku höfuðborginni.

Félagslið Ísraels eru í sömu stöðu. Maccabi Tel Aviv náði að mæta Breiðabliki í Ísrael í riðlakeppni Sambandsdeildar Evrópu 21. september, áður en stríðið hófst, en hefur síðan spilað heimaleiki sína í Serbíu og féll þar úr keppni fyrir rúmri viku, gegn Olympiacos, þrátt fyrir að hafa unnið útileikinn 4-1. Heimaleikur liðsins fór einnig 4-1 og Olympiacos vann í framlengingu.

Ísrael hefur verið aðili að Knattspyrnusambandi Evrópu síðustu þrjá áratugi, þrátt fyrir að landið sé utan Evrópu, eftir að liðinu var meinuð þátttaka í keppnum Knattspyrnusambands Asíu. Nokkrar þjóðir, þar á meðal Kúvæt og Norður-Kórea, höfðu þá neitað að spila gegn Ísraelum.

Knattspyrnusamband Vestur-Asíu, sem telur tólf þjóðir, krafðist þess í opnu bréfi til FIFA og UEFA fyrir tveimur mánuðum að ísraelsk lið yrðu bönnuð frá allri keppni. Að sambandinu eiga meðal annars aðild Jórdanía, Palestína, Katar, Sádi Arabía og Sameinuðu arabísku furstadæmin.

Theodore Theodoridis, aðalritari UEFA, hefur hins vegar sagt að enginn vilji sé hjá stjórn UEFA til að setja Ísraela í keppnisbann, líkt og gert var við Rússa vegna innrásar þeirra í Úkraínu. Sagði hann um tvö gjörólík tilvik að ræða.

Möguleiki Ísraela á að spila á EM var því galopinn þar til að liðið tapaði fyrir Íslandi í gærkvöld.

Leikur Úkraínu og Íslands verður sýndur í opinni dagskrá á Stöð 2 Sport þriðjudaginn 26. mars. Leikurinn hefst klukkan 19.45 en upphitun fyrir leikinn hefst klukkan 19.10.