„Ekkert að stressa sig of mikið á því hvað er að gerast í kringum þá“

Ísland mætir Ísrael í umspili um laust sæti á EM í Þýskalandi í sumar en leikurinn fer fram í kvöld í Búdapest og er í opinni dagskrá á Stöð 2 Sport. Arnór segist vera mjög bjartsýnn.

„Við erum með góða blöndu af yngri og eldri leikmönnum. Við erum með leikmenn sem hafa gert þetta áður og svo erum við með leikmenn af nýrri kynslóð sem eru algjörlega frábærir og ég verð að fá að hrósa þeim líka. Þessir strákar lifa svo mikið í núinu og eru ekkert að stressa sig of mikið á því hvað er að gerast í kringum þá. Við erum núna að fara spila um það að komast á EM og þeir eru bara það einbeittir að það er ekkert að trufla þá of mikið.“

Ef leikurinn í kvöld endar jafn eftir venjulegan leiktíma verður framlengt og því næst vítaspyrnukeppni. Arnór er ekkert hræddur við það að taka vítaspyrnu.

„Ég er góð vítaskytta. Ég er klárlega til í að taka vítaspyrnu, bara settu mig á punktinn,“ segir Arnór en hér að neðan má sjá viðtalið í heild sinni.