„Rýmingin gekk vel. Við viljum þakka gestum góðan skilning, starfsmönnum fagleg vinnubrögð og viðbragðsaðilum gott samstarf,“ segir í tilkynningu frá Helgu Árnadóttur, framkvæmdastjóra hjá Bláa lóninu.
Starfsstöðvum Bláa lónsins í Svartsengi hefur verið lokað. Frekari upplýsingar verða veittar eftir því sem líður á morgundaginn.
Fram kom í máli Bjarneyjar Annelsdóttur yfirlögregluþjóns á Suðurnesjum í aukafréttatíma RÚV klukkan 22 að um sjö hundruð manns hefðu verið í Bláa lóninu. Um 30 til 40 mínútur tók að rýma.
