Telja að verið sé að leggja drög að því að dóttir Kim taki við völdum

Íbúum Norður-Kóreu hefur verið talin trú um að í æðum Kim-fjölskyldunnar renni heilagt blóð og að hún ein sé þess megnug að leiða og stjórna landinu. 

Líkt og almennt gildir um Norður-Kóreu er fátt vitað um fjölskyldu Kim, sem greindi til að mynda ekki frá því fyrr en seint og síðar meir að hann hefði gengið í hjónaband með eiginkonu sinni Ri Sol Ju.

Talið er að dóttir Kim sé um tíu ára gömul og næst elsta barn leiðtogans. Síðustu misseri hefur hún ítrekað sést í fylgd föður síns við ýmis tækifæri og þá hefur sú breyting vakið athygli að nú er vísað til hennar sem „virðingarverðar“ dóttur leiðtogans í stað „elskaðrar“ dóttur hans.

Í Norður-Kóreu er „virðingarverður“ aðeins notað um fámennan og útvalinn hóp og Kim sjálfur var til að mynda ekki kallaður „virðingarverður“ fyrr en ljóst var orðið að hann yrði næsti leiðtogi landsins.

Talið er að Kim vilji venja þegna landsins við að sjá dóttur hans í fylgd með honum, bæði til að tryggja að hún sé þekkt stærð þegar til þess kæmi að hún tæki við og til þess að undirbúa þá undir að kona taki við völdum í fyrsta sinn.