Mikið á­fall fyrir ís­lenska kvenna­lands­liðið: Elín Klara ekki á HM

Handknattleikssamband Íslands staðfestir í dag að Elín Klara hafi þurft að draga sig úr íslenska landsliðshópnum vegna meiðslanna og Arnar Pétursson hefur kallað Kötlu Maríu Magnúsdóttur, leikmann Selfoss, í hennar stað.

Elín Klara meiddist á ökkla á æfingu með Haukum í síðustu viku. Hún lék ekki síðasta leik Haukanna fyrir HM- og jólafrí og nú er orðið ljóst að hún nær sér ekki góðri fyrir heimsmeistaramótið.

HM kvenna hefst  30. nóvember næstkomandi. Ísland leikur í D-riðli í Stavanger og mætir Slóveníu, Frakklandi og Angóla í riðlinum. Landsliðið tekur þátt í Posten Cup í Lillehammer og Hamar í aðdraganda HM og er fyrsti leikur þeirra á fimmtudaginn gegn Póllandi.

Elín Klara hefur fylgt eftir frábæru tímabili í fyrra og er með 7,5 mörk og 4,0 stoðsendingar að meðaltali í leik samkvæmt tölfræði HB Statz. Hún var líka búin að vinna sig inn í hlutverk hjá íslenska A-landsliðinu.

Þetta er mikið áfall fyrir íslenska landsliðið sem er á leiðinni á sitt fyrsta stórmót í ellefu ár.

Verst er þetta auðvitað fyrir Elínu Klöru sjálfa sem hefur slegið í gegn með frábærri frammistöðu sinni síðustu ár.