„Nafnið Verona hefur sterka þýðingu í hugum okkar eigenda“

Svava Marín Óskarsdóttir skrifar 14. nóvember 2023 09:29

Eigendur verslunarinnar, Ragnhildur Steinunn Jónsdóttir, Haukur Ingi Guðnason, Martina Vigdís Nardini og Jón Helgi Erlendsson. Íris Dögg.

Verslun fjölmiðlakonunnar, Ragnhildar Steinunnar Jónsdóttur, Hauks Inga Guðnasonar og vinahjónanna, Martinu Vigdísar Nardini og Jóns Helga Erlendssonar, hefur fengið nafnið Verona. Í Verona sameinast tvær rótgrónar verslanir; Duxiana og Gegnum glerið sem voru áður í Ármúla 10 um árabil. Ný verslun opnar í dag við Ármúla 17.

Verona verður heimili tímalausrar hönnunar með Duxiana í fararbroddi sem er heimsþekkt fyrir hágæða sænsk DUX rúm, sængur, kodda og húsgögn. Þá mun Verona bjóða upp á úrval ljósa frá Louis Poulsen, ítalskar innréttingar og húsgögn frá Molteni&C, vefnaðarvöru frá Georg Jensen Damask og GANT og handgerðar vörur frá Lambert.

„Við höfum nú sameinað þessar tvær verslanir á nýjum stað í Ármúla 17 undir nafninu Verona. Duxiana verður okkar helsta vörumerki enda leggjum við áherslu á gæðahönnun og vörur sem eru framleiddar með sjálfbærni og langtíma endingu að leiðarljósi. Okkar markmið er að bjóða upp á hönnunarvörur sem eldast með eigendum sínum,” segir Ragnhildur Steinunn.

Læknisráðgjöf þegar kemur að vali á rúmi

Í Verona verður boðið upp á ýmsar spennandi nýjungar sem endurspegla stefnu og markmið verslunarinnar í tengslum við upplifun og þjónustu. Á verona.is verður hægt að óska eftir heimsókn í Verona utan hefðbundins opnunartíma með það að markmiði að auka þjónustu við fólk utan af landi. Þar verða einnig ítarlegar upplýsingar um allt það vöruúrval sem Verona býður upp á. Reglulega verður hægt að fá læknisráðgjöf þegar kemur að vali á rúmi og koddum auk þess sem Verona stefnir á að kynna nýja íslenska hönnun fyrir landsmönnum á komandi ári.

„Við erum mjög spennt að fara af stað með Verona í nýju húsnæði hér í Ármúla 17. Nafnið Verona hefur sterka þýðingu í hugum okkar eigenda enda höfum við öll sérstaka tengingu við þessa fallegu borg. Við hlökkum til að taka vel á móti viðskiptavinum okkar, gömlum og nýjum, með ítölsku kaffi í Ármúlanum,” segir Haukur Ingi framkvæmdastjóri Verona.