Arteta íhugar að skipta um markvörð

Daily Mail greinir frá því að Mikel Arteta, knattspynustjóri Arsenal, íhugi alvarlega að gefa Raya tækifæri í byrjunarliði Skyttanna.

Ramsdale hefur verið aðalmarkvörður Arsenal síðan hann kom frá Sheffield United fyrir tveimur árum. Hann var valinn í lið ársins á Englandi á síðasta tímabili.

Arsenal fékk hins vegar Raya á láni frá Brentford í síðasta mánuði og talið er að Arteta vilji gefa honum tækifæri til að vinna sér sæti í byrjunarliðinu. 

Hann gæti til að mynda spilað þegar Arsenal mætir Brentford í deildabikarnum í lok mánaðarins. Leikmenn mega venjulega ekki spila gegn liðinu sem þeir eru samningsbundnir en hægt er að fá undanþágu til þess í deildabikarnum og talið er ólíklegt að Brentford setji sig upp á móti því að Raya spili leikinn.

Ramsdale hefur varið markið í fyrstu fjórum leikjum Arsenal á tímabilinu, meðal annars í 3-1 sigrinum á Manchester United á sunnudaginn.

Arsenal er í 5. sæti ensku úrvalsdeildarinnar með tíu stig, tveimur stigum á eftir toppliði Manchester City.