Skagamenn nálgast toppinn og dramatík í Þorlákshöfn

Það var Gísli Laxdal Unnarsson sem skoraði eina mark leiksins er ÍA vann mikilvægan sigur gegn Fjölni í kvöld, en sigurinn þýðir að Skagamenn eru nú aðeins þremur stigum á eftir toppliði Aftureldinga og fjórum stigum fyrir ofan Fjölni sem situr í þriðja sætinu.

Í Þorlákshöfn var boðið upp á dramatík þar sem Bjarni Guðjón Brynjólfsson og Alexander Már Þorláksson sáu til þess að Þórsarar leiddu 2-0 gegn Ægi. Heimamenn jöfnuðu þó metin með marki frá Ivo Braz og sjálfsmarki frá Bjarka Þór Viðarssyni, en Nökkvi Hjörvarsson endurheimti forystu norðanmanna og tryggði um leið sigurinn á fjórðu mínútu uppbótartíma.

Þá sáu þeir Róbert Quental Árnason og Arnór Ingi Kristinsson um markaskorun Leiknis er liðið vann 2-1 sigur gegn Gróttu. Axel Sigurðarson skoraði mark gestanna, en þetta var sjötti sigur Leiknis í röð og liðið situr nú í fjórða sæti með 26 stig.

Upplýsingar um úrslit og markaskorara fengust á Fótbolti.net.