Andri og Ragnhildur á toppnum og niðurskurðurinn nálgast

Konurnar hafa flestar lokið leik í dag þó enn séu nokkrar sem eiga eftir að klára síðustu holurnar. Ragnhildur Kristinsdóttir hélt uppi uppteknum hætti frá því í gær og lék hringinn á 70 höggum og er því ein á toppnum á samtals tveimur höggum undir pari.

Guðrún Brá Björgvinsdóttir situr í öðru sæti á einu höggi yfir pari, en Hulda Clara Gestsdóttir, sem var í forystu eftir gærdaginn með Ragnhildi, situr í þriðja sæti á þremur höggum yfir pari ásamt nöfnunum Andreu Ýr Ásmundsdóttur og Andreu Björg Bergsdóttur.

Alls komust 29 kylfingar í gegnum niðurskurðinn hjá konunum, en 19 féllu úr leik.

Hjá körlunum heldur Andri Þór Björnsson toppsætinu, en karlarnir eru þó komnir styttra en konurnar. Þegar þetta er ritað hefur Andri leikið 14 holur og er samtals á átta höggum undir pari.

Huðmundur Ágúst Kristjánsson hefur spilað vel í dag og er á sjö höggum undir pari í öðru sæti eftir 16 holur og í þriðja sæti eru Logi Sigurðsson og Hlynur Geir Hjartarson á sex höggum undir pari.

Eins og staðan er núna er niðurskurðarlínan við 13 högg yfir pari, en alls eru 11 kylfingar á hættusvæðinu.

Stöðu mótsins í rauntíma má finna á heimasíðu Golfsambands Íslands með því að smella hér.