Flott veiði á Arnarvatnsheiði

Arnarvatnsheiði, Skagaheiði og Veiðivötn eru vinsælustu vatnasvæðin hjá þeim stóra hóp veiðimanna sem sækir í að komast í góðan silung og þessi vötn virðast hafa komið einstaklega vel undan vetri. Við höfum greint frá frábærri veiði í veiðivötnum í sumar alveg frá opnun en opnunin var ein sú allra besta í tuttugu ár. Skagaheiðin hefur að sama skapi verið góð og þeir sem stunda hana mikið segja að fiskurinn sé yfirleitt um pundinu stærri en í fyrra. 

Arnarvatnsheiðin hefur verið að gefa mjög fína veiði síðustu daga og þurrkur og úrkomuleysi hefur engin áhrif þar uppfrá nema til hins betra. Þegar vötnin hlýna safnast bleikjan og urriðinn í litlar torfur sem sækir í ósa lækja sem renna í mörg vötnin. Lækjarvatnið er kaldara og það er nákvæmlega það sem fiskurinn er að leita eftir. Kaldara vatn. Bleikjan og urriðinn á heiðinni er yfirleitt um tvo til þrjú pund en inná milli veiðast alltaf stærri fiskar.