Börn beittu knatt­spyrnu­strák kyn­þáttaníði á N1 mótinu

Faðir ungs knattspyrnumanns sagði frá óskemmtilegri reynslu sonar síns í viðtali á Rás 2 í morgun.

Atvikið varð þegar sonur hans var að keppa á N1 mótinu á Akureyri. Ingvar Örn Sighvatsson sagði frá þessari neikvæðu upplifun sonar síns af þessu móti en hann er að verða ellefu ára gamall. Sonurinn á mömmu sem er svört en pabba sem er hvítur.

„Welcome to Iceland“

„Þetta var í rauninni fleira en eitt atvik en við heyrðum á honum eftir einn leik að þetta voru drengir á hliðarlínunni sem voru úr sama liði og hann var að keppa við. Þetta eru mörg lið frá hverju íþróttafélagi. Þeir voru að gera athugasemdir við hann sem vörðuðu uppruna hans. Welcome to Iceland og eitthvað annað sem hann sagði okkur ekki,“ sagði Ingvar Örn Sighvatsson í Morgunútvarpinu í dag.

„Við höfum ekki verið að krefja hann um nákvæma lýsingu á því sem fram fer. Hann vill oft ekki tala um það. Ég fór þegar til mótsstjórnar og tilkynnti þetta. Þau brugðist vel við,“ sagði Ingvar Örn.

Allir fögnuðu nema hann sem var grátandi

„Svo gerðist þetta aftur seinna á mótinu. Þá í rauninni kom hann til móður sinnar í tárum eftir leik sem þeir höfðu unnið. Það var fögnuður en hann var í tárum af því að það voru aftur athugasemdir tengdar uppruna hans eitthvað í þessum dúr. Ég veit ekki hvað það er en það skiptir kannski ekki máli,“ sagði Ingvar.

„Þetta er vandi sem við höfðum séð vaxa eftir því sem hann eldist. Í leikskóla er þetta forvitni, einlæg: Af hverju ertu svona brúnn. Þú ert eins og súkkulaði. Svona skemmtilegt. Þetta er barnsleg einlægni og þetta er saklaust. Eftir því sem hann eldist þá sjáum við meira að þetta er notað í smækkandi tilgangi,“ sagði Ingvar.

Hann segir okkur ekki allt

„Við sjáum á honum að líðanin hefur verið að breytast með hverju árinu. Við vitum ekki hvað er alltaf í gangi. Hann segir okkur ekki allt,“ sagði Ingvar sem segir að fólk á Íslandi sé svo ómeðvitað um fordómana sem búa í samfélaginu.

„Við erum ekki að gera neitt til að uppræta þá, benda fólki á þá því það þarf átak til að takast á við þetta,“ sagði Ingvar. Hann varð ekki var við það að dómarar eða foreldrar hafi tekið á þessu.

Heyrði af dreng sem var vísað af mótinu

„Foreldrar á hliðarlínunni eru oft taldir vandamál í sjálfu sér. Ég veit ekki hvort dómararnir verði endilega varir við þetta. Ég held að ég hafi heyrt af einu atviki um að dreng hafi verið vísað af mótinu. Það er eitthvað sem ég heyrði en hef ekki fengið staðfest en hann var vísað af mótinu fyrir að uppnefna hörundsdökkan einstakling úr einu liði,“ sagði Ingvar.