Brott­rekstur lands­liðsknapa: „Hann veit allt um málið“

Í fundarboði sem fréttastofa hefur undir höndum kemur fram að Konráð hafi verið boðaður á fund síðastliðinn fimmtudag með Kristni Skúlasyni, formanni landsliðsnefndar, og Berglindi Karlsdóttur, framkvæmdastjóra Landssambands hestamannafélaga (LH). „Fundarefni er atvik sem átti sér stað í tengslum við Reykjavíkurmót. Vinsamlegast mættu einn á fundinn, sem landsliðsknapi LH,“ segir í fundarboðinu.

Um helgina var greint frá því að tveim knöpum hefði verið vísað úr landsliðinu, Konráði og Jóhannesi Rúnari Skúlasyni. Brottrekstur Jóhannesar tengist meðal annars dómum sem hann hefur hlotið fyrir ofbeldismál en landsliðsnefnd hefur ekki upplýst um ástæðurnar fyrir brottrekstri Konráðs. Sigurbjörn Bárðarson, landsliðseinvaldur, segir að landsliðsknapi þurfi að sýna íþróttamannslega hegðun utan sem innan vallar.

Brottrekstur

Daginn eftir fundinn fékk Konráð bréf þar sem honum var tilkynnt um brottreksturinn. Þar segir:

„Með hegðun þinni hefur þú sýnt af þér m.a. ósæmilega hegðun og sýnt af þér siðferðislega ámælisverða háttsemi sem kann að skaða ímynd eða orðspor LH og hefur þannig gerst brotlegur við m.a. 10. gr. Framangreinds samnings og siðareglur LH.“

Minnt er á að Konráð hafi hlotið tiltal og áminningar en ekki greint hvers lags eðlis brotin séu. Undirrita þetta bréf áðurnefnd Kristinn, Berglind og Sigurbjörn.

Árekstur og átök

Á þriðja degi Reykjavíkurmeistaramótsins í Víðidal, þann 14. júní, kom upp atvik þar sem Konráð bakkaði á mannlausan bíl samkvæmt tjónaskýrslu og bréfum. Bíllinn var í eigu Alendis, fyrirtækis sem streymir útsendingum frá hestamannaviðburðum.

Gekkst Konráð við þessu og sendi afsökunarbréf til eiganda bílsins. Í því bréfi sagðist hann ekki hafa gert sér grein fyrir aðstæðum í ljósi þess hversu stórum bíl hann hafi verið á og lýsti yfir fullri ábyrgð á atvikinu.

Seinna þennan dag kom til orðaskipta og átaka á milli hans og fólki tengdu Alendis samkvæmt bréfi Óskars Sæbergs Sigurðssonar, lögfræðings og talsmanns Konráðs, til landsliðsnefndar. Samkvæmt bréfinu hefur Konráð lagt fram kæru til lögreglu vegna líkamsárásar.

Þremur dögum eftir umrætt atvik sendi Konráð Fáki bréf þar sem hann skráði sig úr 100 metra keppni í skeiði. Sagði hann í bréfinu það hafa verið að læknisráði vegna téðrar líkamsárásar og áverkar hafi þróast á þann veg að óhjákvæmilegt sé annað en að hætta keppni.

Í apríl síðastliðnum greindi DV frá því að bróðir Konráðs stæði í málaferlum við Alendis, þar sem hann var áður framkvæmdastjóri.

Kært til ÍSÍ

Konráð vill ekki ræða við fréttastofu að sögn Óskars Sæbergs, geti Konráð ekki farið venjulega kæruleið varðandi brottreksturinn og þurfi að fara beint í dómstól ÍSÍ til að reyna að fá bráðabirgðaúrskurð til að hnekkja ákvörðuninni.

Í bréfi til framkvæmdastjóra LH og landsliðsnefndar á föstudag óskaði Óskar eftir rökstuðningi fyrir brottrekstrinum. Þar segir einnig að Konráð hafi einnig óskað eftir rökstuðningi.

„Hann veit allt um málið“

Kristinn Skúlason hefur ekki viljað tjá sig um málið utan við yfirlýsingu sem birt var í hestamannamiðlinum Eiðfaxa á laugardag. Þar greindi hann ekki efnislega frá þeim atvikum sem lágu til grundvallar brottrekstrinum.

Við Vísi segist Kristinn hins vegar hafa útskýrt það munnlega fyrir Konráði hvaða atvik um sé að ræða. „Hann veit allt um málið,“ segir Kristinn.

Aðspurður um hvort að hann telji málið muni halda fyrir dómstól ÍSÍ segir Kristinn að það „verði að koma í ljós.“

Aðlögunartíminn liðinn

Sigurbjörn Bárðarson svaraði hins vegar fréttastofu og sagði það þung spor sem tekin séu við slíkar aðstæður og vel ígrundaðar. Þegar landsliðsknapi sé valinn í hópinn skrifi hann undir samning sem varðar meðal annars aga - og siðareglur ÍSÍ og með því afsali hann sér ákveðnum lífsstíl með því að gerast fyrirmynd fyrir hönd landsliðs Íslands í hestaíþróttum.

„Í þessum samningi eru mjög skýr ákvæði um framkomu og siðareglur um til að mynda aga, áfengis og lyfjanotkun,“ segir Sigurbjörn. „Landsliðsknapi á að leitast við að vera fyrirmynd íþróttarinnar jafnt inn á við sem út á við og sýna ávallt íþróttamannslega hegðun í hvívetna innan og ekki síst utan vallar.“

Það sé mat landsliðsnefndar að bæði Konráð og Jóhannes hafi gerst brotlegir við þessar reglur. Málin séu hins vegar mjög ólík.

Þá segir Sigurbjörn að fyrir hartnær áratug hafi verið tekin upp einörð stefna innan landsliðsnefndar um að hefja íþróttina til enn meiri vegs og virðingar og kynna sér störf annarra íþróttagreina innan ÍSÍ. Vildi nefndin komast á sama stall og aðrar íþróttagreinar, ekki síst með tilliti til aga- og siðareglna.

„Með það að leiðarljósi hófst bæði kynning, vinnubrögðum var breytt og kröfur til knapa og öll umgjörð í kringum landsliðið í hestaíþróttum tók byltingarkenndum breytingum,“ segir Sigurbjörn.

Fagmenn hafi komið að uppbyggingu og stefnumótun til framtíðar og aðlögunartími gefinn fyrir auknar kröfur sem gerðar eru til hestaíþróttamanna sem keppa undir fána ÍSÍ.

„Í dag er þessi aðlögunartími liðinn og því gerðar sömu kröfur til hestaíþróttamanna og til annarra í íþróttum almennt,“ segir Sigurbjörn. „Enginn er yfir það hafinn að undirgangast ekki þær almennu kröfur sem gerðar eru til allra íþróttamanna.“

Rangar buxur

Eins og áður var nefnt hefur verið nefnt hefur Konráð fengið áminningar frá LH. Fyrri áminningin veittu formaður og þjálfari landsliðs í nóvember árið 2022. Það er vegna framkomu vegna klæðaburðar fyrir myndatöku A-landsliðs í Bláa lóninu í október.

„Öllum knöpum voru fyrir viðburðinn send fyrirmæli með tölvupósti um það hvaða fatnaðar væri krafist. Þeim fyrirmælum fórst þú ekki eftir og sýndir þannig athöfninni vanvirðingu með þeim klæðnaði sem þú mættir í,” sagði í áminningarbréfinu.

Konráð hafði mætt í ljósbláum gallabuxum en ekki ljósbláum kakíbuxum í myndatökuna.

Seinni áminninguna fékk Konráð fyrir að mæta seint á viðburðinn „Allra sterkustu“ í byrjun maí á þessu ári.