Tókust á um stöðu verðbólgu og vaxta í Pallborðinu

Heimir Már Pétursson skrifar 30. maí 2023 12:21

Ragnar Þór Ingólfsson, Kristrún Frostadóttir og Þorsteinn Víglundsson verða gestir Heimis Más Péturssonar í Pallborðinu klukkan 14:00 í dag. Vísir/Sara

Þorsteinn Víglundsson, fyrrverandi félags- og vinnumarkaðsráðherra og fyrrverandi framkvæmdastjóri SA, Ragnar Þór Ingólfsson formaður VR og Kristrún Frostadóttir formaður Samfylkingarinnar mæta í Pallborðið með Heimi Má Péturssyni fréttamanni í beinni útsendingu á Vísi og Stöð 2/Vísi klukkan 14:00 í dag.

Öll hafa þau skoðanir á stöðu efnahagsmála, mikilli verðbólgu og háum vöxtum og hvað valdi því að verðbólga er eins mikil og raun ber vitni og vextir í hæstu hæðum. Þrálát verðbólga í kringum tíu prósentin og síhækkandi vextir hafa mikil áhrif á hag heimilanna og efnahagslífið í heild sinni.

Reikna má með að erfiðlega geti gengið að koma saman nýjum kjarasamningum í haust þar. Krafa Seðlabankans er að gerðir verði hófsamir langtímasamningar og að ríkið auki aðhald sitt í ríkisfjármálum. Hins vegar eru farnar að heyrast raddir innan úr verkalýðshreyfingunni að eðlilegast væri að gera aðra skammtímasamninga í ljósi stöðunnar.

Þorsteinn benti á í nýlegri grein á Vísi að raunlaun á Íslandi hefðu hækkað mun meira en í samanburðarríkjum þar sem laun hefðu ýmist staðið í stað eða lækkað. Ragnar Þór hefur sagt að vaxtahækkanir Seðlabankans væru drifkraftur í verðbólgunni út af fyrir sig og vaxtahækkanir Seðlabankans væru aðför að heimilunum.

Kristrún hefur síðan sakað stjórnvöld um að sofa á verðinum í ríkisfjármálum og ekki gert sitt til að vinna með Seðlabankanum í baráttunni við verðbólguna. En síðar í dag gefur Bjarni Benediktsson fjármála- og efnahagsráðherra munnlega skýrslu á Alþingi um stöðu efnahagsmála að beiðni þingmanna Samfylkingarinnar.

Pallborðið hefst klukkan 14:00 og verður í beinni útsendingu á Vísi og Stöð 2/Vísi.

Efnahagsmál Verðlag Kjaraviðræður 2022-23 Ríkisstjórn Katrínar Jakobsdóttur Seðlabankinn Pallborðið

Tengdar fréttir

Forysta SA þarf að „standa í lappirnar“ gegn óraunhæfum launakröfum

Seðlabankastjóri gagnrýnir forsvarsmenn Samtaka atvinnulífsins og segir þá þurfa að „standa meira í lappirnar“ þegar kemur að óraunhæfum kröfum verkalýðsfélaganna um miklar nafnlaunahækkanir en síðustu vaxtahækkanir bankans sýni að það kosti atvinnurekendur að gera dýra kjarasamninga. Kjölfesta verðbólguvæntinga hefur laskast og seðlabankastjóri viðurkennir að bankinn hafi mögulega gert mistök síðasta haust með því að tala ekki skýrar að hann myndi halda áfram sínu striki óháð því hvað aðrir armar hagstjórnarinnar myndu gera.

25. maí 2023 11:01

Seðlabankinn mun ekki hika við að hækka vexti í tveggja stafa tölu

Seðlabankinn mun ekki hika við að hækka meginvexti sína í tveggja stafa tölu ef á þarf að halda til að ná verðbólgu niður að sögn seðlabankastjóra. Bankinn hækkaði vexti um 1,25 prósentustig í morgun og skorar á aðila vinnumarkaðarins að gera hófsama langtímasamninga og stjórnvöld að auka aðhald sitt í efnahagsmálum.

24. maí 2023 19:31

Vonandi ekki þjóðarsátt um að Seðlabankinn bregðist einn við

Ásgeir Jónsson, seðlabankastjóri, segir gríðarlega mikilvægt að aðilar vinnumarkaðarins og ríkisvaldsins standi undir sinni ábyrgð og taki þátt í því að bregðast við verðbólgu og verðbólguvæntingum með Seðlabanka Íslands.

24. maí 2023 10:56

Stærsta vaxtastökkið frá hruni með 125 punkta hækkun Seðlabankans

Peningastefnunefnd kom markaðsaðilum og greinendum á óvart með því að hækka vexti Seðlabankans úr 7,5 prósentum í 8,75 prósentum, sem var umfram væntingar, til að ná böndum á undirliggjandi verðbólgu sem heldur áfram að hækka samtímis því að horfur eru á enn meiri vexti í innlendri eftirspurn í ár. Þrátt fyrir að vaxtahækkunin nú upp á 125 punkta sé sú mesta í einu vetfangi frá því við fall bankanna haustið 2008 þá boðar nefndin enn frekari hækkun vaxta á næstunni.

24. maí 2023 08:57

Mest lesið

Fleiri fréttir