Stutt í að Hraunsfjörður fari í gang

Það hefur verið lítið að frétta þar frá opnun en þeir veiðimenn sem við höfum heyrt frá sem lagt hafa leið sína að vatninu segja að það þurfi nokkra hlýja daga til að koma öllu í gang. Hraunsfjörður er ekki auðveldt veiðivatn en þeir sem hafa náð tökum á vatninu og vita bæði nákvmæmlega hvað á að setja undir og hvar gera yfirleitt nokkuð góða veiði.

Bleikjan í vatninu er mjög bragðgóð og það er varla til betri matfiskur en feit sjóbleikja og það er nákvæmlega það sem dregur veiðimenn að vatninu. Hún er oftar en ekki mjög dyntótt í töku og þegar hún er að sækja í eitt æti er hún ekki líklega í neitt annað. Það fer þess vegna oft mesti tíminn í að finna út hvað hún er að taka hverju sinni. Grænleitar flugur  í marflóarlíki hafa oft gert það gott en Pheasant Tail, Héraeyra, Peter Ross og Peacock hafa líka gefið ágætlega í vatninu. Það verður gaman að heyra frá veiðimönnum þegar veiðin fer í gang en þegar maí er í hlýrri kantinum getur veiðin þarna verið frábær.