Tveir mánuðir frá síðasta marki Dzeko

Dzeko er leikmaður Inter Milan á Ítalíu en hefur glímt við töluverða markaþurrð síðustu vikur með liðinu.

Hann er orðinn 37 ára gamall og er bæði leikjahæsti og markahæsti leikmaður í sögu Bosníu. Hann hefur leikið 126 landsleiki og skorað í þeim 64 mörk.

Honum hefur aftur á móti gengið illa að skora síðustu vikur með Inter Milan en hans síðasta mark kom í 3-0 sigri á AC Milan í Ofurbikar Ítalíu þann 17. janúar. Tveir mánuðir eru því liðnir frá síðasta marki kappans og hefur hann leikið ellefu deildarleiki frá því hann skoraði síðast í Seríu A, í 1-0 sigri á Napoli í upphafi árs.

Framherjinn stæðilegi á hins vegar til að stíga upp með landsliðinu og er til alls líklegur í kvöld gegn íslenskri vörn sem hefur oft verið betur mönnuð. Sverrir Ingi Ingason dró sig úr landsliðshópnum og þá verður Aron Einar Gunnarsson í leikbanni.

Leikur Íslands og Bosníu hefst klukkan 19:45 í kvöld og verður lýst beint á Vísi auk þess sem allt saman verður gert vel upp eftir leik.