Pogba mætti of seint og er ekki í hóp í kvöld

Paul Pogba gekk til liðs við Juventus síðasta sumar á frjálsri sölu frá Manchester United. Hann hefur þó lítið komið við sögu á tímabilinu vegna meiðsla og aðeins nýlega kominn aftur á ferðina.

Nú er Pogba búinn að koma sér í vandræði og það ekki í fyrsta sinn á ferlinum. Hann mætti of seint á liðsfund Juventus fyrir leikinn gegn Freiburg í Evrópudeildinni og Massimiliano Allegri tilkynnti Pogba í kjölfarið að hann yrði ekki í leikmannahópnum í kvöld.

Pogba hefur aðeins komið við sögu í tveimur leikjum Juventus á tímabilinu en hann sneri aftur eftir meiðslin undir lok febrúar. Juventus leikur gegn Freiburg á heimavelli í kvöld en um er að ræða fyrri leik liðanna í 16-liða úrslitum.