Björgvin Páll varði yfir tuttugu skot í níu marka sigri á Pays d'Aix og skoraði einnig eitt mark til að kóróna frammistöðu sína. Hann hefur nú skorað fimm mörk í keppninni þar af fjögur þeirra í þremur leikjum Valsmanna í febrúar.
Auk þess að fá skráð á sig tuttugu skot í opinberri tölfræði keppninnar þá var Björgvin einnig með fimm stoðsendingar í leiknum. Hann átti því þátt í sex mörkum Valsliðsins í leiknum.
Þessi frábæra frammistaða og þessi tuttugu vörðu skot skila honum líka í efsta sætið yfir flest varin skot í allri Evrópudeildinni. Samkvæmt opinberri tölfræði mótsins þá hefur Björgvin varið 113 skot í leikjunum níu eða 12,6 skot í leik.
Björgvin hefur varið átta skotum meira en næsti maður sem er Niklas Kraft hjá sænska liðinu Ystad. Þeir tveir eru þeir einu sem hafa varið yfir hundrað skot í keppninni til þessa.
Björgvin er jafnframt í fjórða sætið yfir flest varin víti en hann hefur varið sjö víti í þessum níu leikjum Valsliðsins.
- Flest varin skot markvarða í Evrópudeildinni:
- 1. Björgvin Páll Gústavsson, Val 113/7
- 2. Niklas Kraft, Ystad 105/7
- 3. Rangel da Rosa, Granollers 98/5
- 4. Christoffer Hoffmann Bonde, Skjern 95/11
- 5. Golub Doknic, Alpla HC Hard 89/6
- 6. Arian Andó, Balatonfüredi KSE 83/4
