Martínez notar sama uppnefni um Weghorst og Messi gerði

Heitt var í kolunum þegar Argentína sló Holland úr leik í átta liða úrslitum á HM í Katar í desember. Weghorst skoraði bæði mörk Hollendinga sem knúðu fram vítaspyrnukeppni eftir að hafa lent 2-0 undir. Argentína vann svo vítakeppnina og varð á endanum heimsmeistari.

Í leikmannagöngunum eftir leikinn sagði Messi Weghorst að hypja sig þegar hann ætlaði að þakka honum fyrir leikinn og freista þess að fá treyjuna hans. Og Messi kallaði Weghorst bobo, eða hálfvita.

Weghorst gekk í raðir United í janúar og Martínez ku ekki kalla hann annað en bobo. Weghorst tekur ekki illa í það enda sagðist hann eitt sinn vera þakklátur fyrir að Messi þekkti hann með nafni.

Weghorst hefur ekki farið af stað með neinum látum með United og aðeins skorað eitt mark í sjö leikjum fyrir liðið.