Yfirvöld loka Machu Picchu vegna mótmælanna

Yfir 400 manns sem höfðu lagt leið sína að þessari mikilfenglegu virkisborg Inka sátu fastir þegar lestarsamgöngur voru lagðar niður á fimmtudag. Það var gert í kjölfar þess að skemmdir voru unnar á lestarteinum en yfirvöld hafa vísað ábyrgðinni á hendur mótmælendum.

Búið er að flytja fólkið frá staðnum.

Machu Picchu er eitt af sjö undrum veraldar og heimsóttur af um milljón manns á ári hverju. Sumir velja að ganga að virkisborginni eftir svokallaðri Inka-slóð, sem tekur nokkra daga. Henni hefur einnig verið lokað.

Menningarmálaráðueytið í Perú hefur sagt að þeir sem hafa þegar keypt aðgangsmiða að Machu Picchu geti notað miðan í mánuð eftir að mótmælunum í landinu lýkur eða fengið endurgreitt.

Tugir hafa látið lífið í mótmælunum en mótmælendur vilja forsetann, Dinu Boluarte, frá og krefjast nýrra þingkosninga. Þá krefjast þeir þess að forveri Boluarte, Pedro Castillo, verði látinn laus úr fangelsi.

Hann hefur verið ákærður fyrir uppreisn og samsæri en neitar sök og segist réttmætur leiðtogi landsins.

Evrópusambandið hefur fordæmt ofbeldið sem ríkir í landinu og valdbeitingu lögreglu.