Ó­fögur reynslu­saga af sam­skiptum við leigufélagið Ölmu

Reynslusögur leigjenda hrannast upp en eins og Vísir greindi frá er Ragnar Þór Ingólfsson formaður VR nú að safna slíkum sögum saman auk þess sem slíkar frásagnir hafa ratað í fjölmiðla. Vísir heyrði í Katrínu Maríu sem nú er búsett ásamt barnungum syni sínum í Ásbrún í Reykjanesbæ. Hún leigir af Heimstaden, sem er helsti keppinautur Ölmu á leigumarkaði. Katrín María lætur ágætlega af því þó leigan, sem er núna 180 þúsund krónur en hækkar með neysluvísitölu upp í 193 þúsund krónur taki í. Og hún vildi svo gjarnan vera á höfuðborgarsvæðinu þar sem tengslanet hennar er. Katrín María er að skoða aðra möguleika en kostirnir í stöðunni eru ekki margir.

Íbúðin í hörmulegu ásigkomulagi strax frá upphafi.

„Við leigðum hjá Ölmu frá mars 2021 til apríl 2022,“ segir Katrín María. Hún telur vert að deila sögu sinni ef það megi verða öðrum víti til varnaðar. Íbúðin sú var í Klukkubergi 41 í Hafnarfirði.

„Þegar við tókum við íbúðinni var ekkert rafmagn í stofunni og sírennsli í nokkrum ofnum. Og í raun var morandi mygla í öllu þakinu, í barnaherbergi og aðalsvefnherbergi. Auk þess sem svalirnar voru að hrynja i sundur og allir gluggar að lekir.“

En myglan átti eftir að koma í ljós síðar. Katrín María segir að maður hafi komið til að laga ljósið og hún hafi þá spurt út í torkennilega áferð og/eða lit á loftinu sem seinna átti eftir að koma í ljós að var mygla en hann hafi gert sér lítið fyrir og burstað það í burtu eins og ekkert væri. Ekkert hafi verið mælt eða skoðað nánar.

Þurftu að yfirgefa íbúðina með nýfæddan dreng

Katrín segir að iðnaðarmenn hafi komið þá um sumarið til að huga að svölum hússins en þau hafi aldrei verið látin vita um eitt né neitt sem því tengdist. Og aldrei kom til álita að þau fengju einhvern afslátt á leigu vegna alls ónæðisins og álags sem því fylgdi.

„Seinna meir eftir að byrjar að rigna heiftarlega þá tek ég eftir hvað það blæs með öllum gluggum og lekur inn. Ég sendi inn tilkynningu en ekkert var gert. Einhver kom og segist ætla að gera eitthvað eða panta eitthvað en ekkert skeður.“

Katrín María segir að á þessu hafi gengið allt fram í janúar á þessu ári.

„Þá vorum við nýkomin heim með einn 2 daga strák, okkar fyrsta barn og það lak úr loftinu í stofunni. Ég hringdi í leigufélagið en fékk engin svör og ekkert gert þó ég útskýrði hættuna og hvernig staðan væri. Næsta dag hringdi ég aftur og ekkert.“

Íbúðin reyndist undirlögð í myglu

Það er ekki fyrr en daginn þar á eftir sem dró til tíðinda, iðnaðarmaður boðaði komu sína. Í kjölfarið var þeim tilkynnt að húsnæðið sé ekki öruggt, allt sé þar undirlagt í myglu og svo hafi í raun verið í nokkur ár. Og fjölskyldan verði að yfirgefa híbýlin.

„Við vorum heimilislaus í einn dag og var svo komið fyrir í einhverri lausri íbúð á Völlunum í Hafnarfirði.“

Tveir menn voru sendir til að flytja, „ taka það helsta“ en Katrín segir að sú íbúð hafi, ótrúlegt en satt, verið í vondu standi einnig.

„Við endum síðan með að vera föst i þessari íbúð í heilan mánuð, þegar við áttum að vera að koma okkur fyrir með okkar litla kríli.“

Engar bætur inni í myndinni

Þau ræddu um skaðabætur vegna þessa en enginn kostur var gefinn á neinu slíku. Þau fengu þó, að sögn Katrínar Maríu, einhvern minniháttar afslátt á leigu þann mánuðinn. Þegar þau svo komu aftur í íbúð sína sáu þau að enn lak, sem þýddi að enn komu iðnaðarmenn sem skáru stórt gat í loftið auk þess að rífa svalirnar, en hurðin þangað er tengd svefnherberginu.

„Stuttu eftir að við fluttum aftur inn i þessa íbúð þá átti að endurgera samning, og það fáránlegasta af öllu er að íbúð sem var ennþá að hrynja i sundur og ennþá láku allir gluggar, risa gat i loftinu, svalir alveg ónothæfar og endalaust straumur verktaka, að þá atti að hækka leiguna um 20 til 30 þúsund krónur.“

Katrín segir að þau hafi aldrei fengið neinar bætur fyrir að hafa búið við þessar ömurlegu aðstæður, það tjón sem þau telja sig í raun hafa orðið fyrir. „Sem hlaust af þessu ógeðslega félagi og núna loksins sjá aðrir hversu ljótt þetta fyrirtæki er i raun,“ segir Katrín María sem vandar Ölmu leigufélagi ekki kveðjurnar.