Tvöfalda þarf framlag Íslands til þróunarsamvinnu

Frjáls félagasamtök í þróunarsamvinnu, sem mynda fræðsluvettvanginn Þróunarsamvinna ber ávöxt ásamt Félagi Sameinuðu þjóðanna á Íslandi, telja mikilvægt að stjórnvöld finni leiðir til að markmið um að öll iðnríki, þar með talið Ísland, veiti 0,7% af vergum þjóðartekjum til þróunarsamvinnu gangi eftir. Íslensk stjórnvöld hafa um áratuga skeið stutt í orði markmið Sameinuðu þjóðanna en hæst hafa framlög Íslands numið 0,35% af vergum þjóðartekjum og það aðeins í fá skipti.

Með hliðsjón af markmiði Sameinuðuþjóðanna og stuðningi Íslands við það markmið til margra áratuga, skora neðangreind félög á löggjafann að tryggja að Ísland nái markmiði sínu um að 0,7% af vergum þjóðartekjum fari í þróunarsamvinnu. Slík samvinna styður fátæk og stríðshrjáð ríki til sjálfshjálpar og til að byggja upp betri lífsskilyrði svo fólk þurfi síður að flýja heimalönd sín.

Í því skyni þyrfti að tvöfalda framlag Íslands til þróunarsamvinnu fyrir árið 2023 þannig að það næmi rúmum 23 milljörðum. Í heimi þar sem stöðugt fleiri neyðast til að flýja heimili sín vegna vopnaðra átaka, ofsókna, fátæktar og loftslagsbreytinga ber efnameiri þjóðum að leggja sitt af mörkum til að stuðla að auknu öryggi og velferð jarðarbúa.

Neðangreind félög telja tilefni til að fagna auknum fjármunum í þróunarsamvinnu á undanförnum árum en betur má ef duga skal. Nái Ísland ofangreindum markmiðum sínum myndi það gefa Íslandi sterkari og trúverðugri rödd á alþjóðavettvangi og tilefni til að hvetja aðrar efnameiri þjóðir til að ná einnig ofangreindu markmiði Sameinuðu þjóðanna.

Fyrir hönd FFÞ og fræðsluvettvangsins Þróunarsamvinna ber ávöxt,

• Birna Þórarinsdóttir, UNICEF á Íslandi
• Bjarni Gíslason, Hjálparstarfi kirkjunnar
• Ellen Calmon, Barnaheill - Save the Children á Íslandi
• Kristín Hjálmtýsdóttir, Rauða krossi Íslands
• Hjalti Skaale Glúmsson, ABC Barnahjálp
• Ragnar Gunnarsson, Kristniboðssambandinu
• Ragnar Schram, SOS Barnaþorpum
• Stella Samúelsdóttir, UN Women á Íslandi
• Valdís Anna Þrastardóttir, Candle Light Foundation
• Vala Karen Viðarsdóttir, Félagi Sameinuðu þjóðanna á Íslandi