Hannes valdi hornið kvöldið áður en hann varði vítið frá Messi

Íslenska karlalandsliðið tók þá þátt í HM í fyrsta sinn og varð fámennasta þjóðin til að keppa á heimsmeistaramótinu.

Ný heimildarmynd um Íslandsævintýrið er nú aðgengileg inn á heimasíðu FIFA en þar er rætt við sex Íslendinga um uppkomu karlalandsliðsins.

Þetta eru þau Heimir Hallgrímsson, landsliðsþjálfari Íslands á þessum tíma, Hannes Þór Halldórsson, markvörður íslenska liðsins á þessum tíma, Margrét Lára Viðarsdóttir, lykilmaður íslenska kvennalandsliðsins sem komst á undan karlalandsliðinu í úrslitakeppni stórmóts.

Þarna er líka rætt við Magnús Örn Helgason, þjálfara sautján ára landsliðs kvenna og Tólfu-meðlimina Benjamín Hallbjörnsson og Svein Ásgeirsson.

Í myndinni er farið yfir ævintýrið með hjálp þessara aðila allt frá því að það byrjaði með frábærum árangri á EM í Frakklandi allt þar til að íslenska liðið komst í úrslitakeppni HM í fyrsta sinn.

Heimsmeistarakeppnin í Rússlandi er auðvitað í aðalhlutverki og ekki síst fyrsti leikurinn á móti Lionel Messi og félögum í Argentínu.

Það eftirminnilegasta við þann leik er kannski ekki markið sem Alfreð Finnbogason skoraði heldur miklu frekar vítaspyrnan sem Hannes Þór Halldórsson varði frá Lionel Messi í seinni hálfleik og tryggði um leið íslenska liðinu jafntefli.

Hannes sagði frá því í myndinni hvenær hann ákvað hvað hann myndi gera ef Messi fengi víti á móti honum.

„Þegar dómarinn blés í flautuna og dæmdi vítið þá hugsaði ég: Ó guð þeir eru að fara að skora,“ sagði Hannes. Vítaspyrnan fær mikið pláss í heimildarmyndinni.

„Svo áttaði ég mig á því að þetta væri tækifæri og ef þú ætlaðir að búa til eitthvað ævintýri þá væri góð hugmynd að láta markvörðinn verja víti frá Messi,“ sagði Hannes.

„Það er pressa á markverðinum allan leikinn með einni undantekningu og það er í vítaspyrnu. Þar hefur markvörðurinn engu að tapa og ef hann ver vítið þá er hann hetja dagsins. Ef leikmaðurinn skorar þá er búist við því,“ sagði Hannes.

„Ég var ekkert stressaður, þetta var bara tækifæri,“ sagði Hannes.

Vítadómurinn og þá sérstaklega vítaspyrnan sjálf eru sýnd með mjög dramatískum hætti og frá öllum mögulegum sjónarhornum.

„Ákvörðunin mín um að skutla mér til hægri var tekin kvöldið fyrir leikinn. Hann tók síðasta vítið sitt á undan þessu einmitt svona og þá skoraði hann,“ sagði Hannes.

„Rétt áður en hann tók vítið þá sló ég saman höndunum og bjó til hljóð. Ég veit ekki hvort það gerði eitthvað,“ sagði Hannes.

Farið er yfir restin af mótinu og ástæðurnar fyrir uppkomu íslenska landsliðsins sem menn skrifa bæði á betri aðstöðu en ekki síst á betri þjálfun.

Það má horfa á alla myndina hér.