Þor­steinn metinn hæfastur um­sækj­enda um stöður héraðs­dómara

Karl Gauti Hjaltason, fyrrverandi sýslumaður og þingmaður Miðflokksins, og Þórhallur Haukur Þorvaldsson lögmaður eru metnir næsthæfastir til að hljóta skipun í embætti héraðsdómara.

Á vef dómsmálaráðuneytisins segir að dómnefndin hafi skilað umsögn sinni vegna staðananna sem auglýstar voru lausar til umsóknar í júlí.

„Mun annar dómarinn hafa starfsstöð við Héraðsdóm Reykjaness en hinn við Héraðsdóm Reykjavíkur en í báðum tilvikum er um að ræða embætti sem munu sinna störfum við alla héraðsdómstólana eftir ákvörðun dómstólasýslunnar. Skipað verður í embættin frá 1. október 2022.

Það er niðurstaða dómnefndar að Þorsteinn Magnússon sé hæfastur umsækjenda og að Karl Gauti Hjaltason og Þórhallur Haukur Þorvaldsson séu næst hæfastir til að hljóta skipun í embætti héraðsdómara.

Dómnefndina skipuðu: Eiríkur Tómasson, formaður, Helga Melkorka Óttarsdóttir, Kristín Benediktsdóttir, Reimar Pétursson og Þorgeir Örlygsson,“ segir í tilkynningunni.