Fótbolti

Byrjunarlið Íslands: Amanda og Munda byrja

Sindri Sverrisson skrifar
Glódís Perla Viggósdóttir, Sandra Sigurðardóttir og fyrirliðinn Sara Björk Gunnarsdóttir eru að vonum á sínum stað í byrjunarliðinu.
Glódís Perla Viggósdóttir, Sandra Sigurðardóttir og fyrirliðinn Sara Björk Gunnarsdóttir eru að vonum á sínum stað í byrjunarliðinu.

Hin 18 ára gamla Amanda Andradóttir er í byrjunarliði Íslands í dag þegar liðið mætir Hvíta-Rússlandi í næstsíðasta leik sínum í undankeppni HM í fótbolta.

Ísland þarf fjögur stig úr leikjum sínum við Hvíta-Rússland og gegn Hollandi ytra á þriðjudag til að tryggja sér öruggt sæti á HM. Liðið er án Karólínu Leu Vilhjálmsdóttur og Öglu Maríu Albertsdóttur vegna meiðsla, auk þess sem Hallbera Guðný Gísladóttir lagði skóna á hilluna eftir EM.

Áslaug Munda Gunnlaugsdóttir er klár í slaginn í stað Hallberu í stöðu vinstri bakvarðar, og Ingibjörg Sigurðardóttir er við hlið Glódísar Perlu Viggósdóttur í miðri vörninni, á kostnað Guðrúnar Arnardóttur sem hóf fyrstu tvo leikina á EM.

Byrjunarlið Íslands:

Markvörður: Sandra Sigurðardóttir 

Vörn: Guðný Árnadóttir, Glódís Perla Viggósdóttir, Ingibjörg Siguðrardóttir, Áslaug Munda Gunnlaugsdóttir.

Miðja: Sara Björk Gunnarsdóttir, Dagný Brynjarsdóttir, Gunnhildur Yrsa Jónsdóttir.

Sókn: Amanda Andradóttir, Sveindís Jane Jónsdóttir, Berglind Björg Þorvaldsdóttir.

Í þætti Bestu markanna á Stöð 2 Sport í vikunni kölluðu sérfræðingarnir eftir því að Amanda, sem leikur með Kristianstad í Svíþjóð, fengi tækifæri í byrjunarliðinu og þeim hefur nú orðið að ósk sinni. Þetta er hennar níundi A-landsleikur og þriðji leikurinn í byrjunarliði, en hún lék aðeins tíu mínútur á EM í sumar.

HM 2023 í Ástralíu og Nýja-Sjálandi Landslið kvenna í fótbolta Fótbolti

Mest lesið


Fleiri fréttir

Sjá meira


×

Mest lesið