Segir afsökunarbeiðnina koma full seint og „þetta á ekki að þurfa að vera svona erfitt“

Runólfur Trausti Þórhallsson skrifar 17. ágúst 2022 16:30

Emilía Rós Ómarsdóttir var valin íþróttamaður ársins af Skautafélagi Akureyrar árið 2015. Skautafélag Akureyrar

Fjórum árum eftir að hafa verið áreitt af þjálfara sínum hjá Skautafélagi Akureyrar þá fékk Emilía Rós Ómarsdóttir loks opinberlega afsökunarbeiðni. Þó hún sé ánægð með að hafa loks fengið afsökunarbeiðni þá kemur hún full seint.

Þetta segir Emilía Rós í ítarlegu viðtali á RÚV þar sem hún fer yfir allt sem gerðist og hvernig þjálfarinn hennar fór úr því að áreita hana yfir í að leggja hana í einelti.

Emilía Rós fór yfir málið í ítarlegu viðtali og lýsti því hvernig hún var áreitt af þjálfara sínum er hún æfði listskauta með Skautafélagi Akureyrar. Þjálfarinn var á fertugsaldri á meðan Emilía Rós var ekki orðin 18 ára gömul.

Á endanum var Emilíu Rós svo gott sem bolað úr SA á meðan þjálfarinn hélt áfram vinnu sinni hjá félaginu. Hann hætti þó skömmu síðar en ekkert bólaði á afsökunarbeiðni, fyrr en nú.

Í viðtalinu við RÚV kemur fram að Emilía Rós hafi leitað til Íþrótta- og Ólympíusambands Íslands en hafi komið að lokuðum dyrum. Var henni bent á að hafa samband við Barnavernd eða lögregluna þar sem ÍSÍ „væri ekkert að höndla svona mál.“

Þegar fjölskylda Emilíu Rósar fékk sér lögmann sem rannsakaði málið, spurði spurninga og sendi formlegar fyrirspurnir til að athuga grundvöll mögulegrar lögsóknar þá loks barst afsökunarbeiðni.

„Ég er auðvitað ánægð með að vera búin að fá hana (afsökunarbeiðnina) en þetta er svolítið lítið og svolítið seint. Þetta á ekki að þurfa að vera svona erfitt. En betra er seint en aldrei, býst ég við,“ sagði Emilía Rós að endingu í viðtali sínu á RÚV aðspurð hvernig færi að hafa loks fengið afsökunarbeiðni.

Afsökunarbeiðni og yfirlýsingu ÍBA og SA má sjá hér að neðan.

Yfirlýsing ÍBA og SA

Stjórn ÍBA og SA vill í einlægni biðja Emilíu Ómarsdóttur og aðra hlutaðeigandi sem og fjölskyldu hennar velvirðingar á ónærgætinni nálgun og viðbrögðum við athugasemdum sem gerðar voru við óviðeigandi framkomu þjálfara Listhlaupadeildar árið 2018.

Gefin var út yfirlýsing í september 2018 þar sem m.a. var sagt: „...að engar sannanir eða merki voru um að þjálfari listskautadeildarinnar hafi brotið siðareglur eða mismunað iðkendum.“

„Það var því miður ekki raunin og þegar málið var skoðað nánar þá kom í ljós að hann áreitti Emilíu á óviðeigandi hátt. Fyrir það var hann áminntur og hætti hann sjálfur sinni þjálfun hjá félaginu stuttu seinna.“

„Með faglegri viðbrögðum hefði verið hægt að draga úr sársauka og þjáningu þeirra sem að málinu komu og auðvelda lausn máls. Þrátt fyrir að á þeim tíma er málið kom upp væru ekki til verkferlar sem auðvelt var að styðjast við og fylgja, þá breytir það ekki því að það er alltaf á ábyrgð stjórnarfólks í íþróttahreyfingunni að leysa mál með þeim að hætti að þau valdi sem minnstri vanlíðan þeirra sem misrétti eru beittir.“

„Af þessu höfum við dregið lærdóm, auk þess sem íþróttahreyfingin öll hefur sett sér betri reglur og verkferla, meðal annars með stofnun embættis samskiptaráðgjafa íþrótta- og æskulýðsstarfs. Við heitum því að fylgja þeim leiðbeiningum og þeim línum sem nú hafa verið lagðar í þeim vandasömu málum sem upp geta komið innan íþróttahreyfingarinnar, með það að leiðarljósi að öllum líði sem best og geti stundað sínar íþróttir í öruggu umhverfi.“

Skautaíþróttir MeToo Akureyri

Tengdar fréttir

Fær afsökunarbeiðni fjórum árum eftir að hafa verið áreitt af þjálfara sínum: „Af þessu höfum við dregið lærdóm“

Stjórn Íþróttabandalags Akureyrar og Skautafélags Akureyrar hefur gefið frá sér tilkynningu þar sem Emilía Rós Ómarsdóttir er beðin afsökunar á atvikum sem áttu sér stað árið 2018.

16. ágúst 2022 14:00

Mest lesið

Fleiri fréttir