„Það getur alveg komið til að ríkið grípi inn í eins og það gerði á Covid-tímum“

Félag íslenskra bifreiðaeigenda skoraði formlega í gær á stjórnvöld að lækka álögur á eldsneyti vegna gríðarlegra hækkana undanfarið. Þá kom fram í Fréttablaðinu í dag að ASÍ, Neytendasamtökin og fleiri krefjist inngripa stjórnvalda vegna eldsneytishækkana.

Fréttastofa sendi fjármálaráðherra fyrirspurn í morgun um hvort það standi til að ræða málið frekar eftir áskoranir úr ýmsum áttum. Ekki bárust svör fyrir hádegisfréttir en í gær kom fram að álögur á olíuverð hafi ekki verið ræddar. Staðan sé áminning um mikilvægi þess að ráðast í orkuskiptin í samgöngum.

Bjarkey Olsen Gunnarsdóttir formaður fjárlaganefndar og varaformaður þingflokks Vinstri grænna útilokaði ekki inngrip stjórnvalda af einhverju tagi vegna verðhækkana undanfarið í þættinum í Bítið í morgun.

„Það getur alveg komið til að ríkið grípi inn í eins og það gerði á Covid-tímum. Kannski verður um einhvern stuðning að ræða í einhverju formi ef stríðið heldur eitthvað áfram gætum við þurft að horfast í augu við það. Svo er alltaf spurning hvort fyrirtækin sjálf geti komið eitthvað að þessu. Samanber að bankarnir geti komið eitthvað að þessu ef verðbólgan fer eitthvað upp. Þetta þarf ekki alltaf að vera ríkið,“ sagði Bjarkey.  

Þórhildur Sunna Ævarsdóttir annar varaformaður efnahags-og viðskiptanefndar og varaformaður þingflokks Pírata telur ekki rétt að lækka álögur á eldsneyti á þessum tímapunkti.

„Stefnan ætti frekar að vera að einbeita sér að umhverfisvænni fararskjótum, flýta orkuskiptum og auka aðgengi lágtekjuhópa að umhverfisvænni farartækjum,“ segir Þórhildur

Í nýrri skýrslu um orkumál sem kynnt var í vikunni kemur fram að þörf er á stóraukinni orkuframleiðslu til að anna orkuskiptum á komandi áratugum. Aðspurð hvort hún sé þá hlynnt fleiri virkjunum, segist  Þórhildur  taka lítið mark á skýrslunni.

„Við eigum eftir að sjá hvort að það er nauðsynlegt að virkja. Ég held að aðalmálið sé að við komum okkur upp betra flutningskerfi og nýtum orkuna betur. Við vitum að heimilin í landinu nota 20% af allri raforku, restin er stóriðja.  Þetta þarf ekki að vera svona að eilífu, það er alveg hægt að taka aðra stefnu í þessum málaflokki,“ segir Þórhildur.

Hún segir jafnframt að ríkið geti gripið til ýmissa ráða varðandi hættu á aukinni verðbólgu. 

„Áður en stríð braust út í Evrópu vorum við komin með ákveðna heimatilbúna verðbólgu sem helgaðist af því að ríkið var búið að setja of mikið í eftirspurnarhliðina á húsnæði með ýmsum aðgerðum sem ýttu upp húsnæðisverðinu sem hefur gríðarlega mikil áhrif á verðbólguna. Það er stærsti liðurinn til að taka á verðbólgunni. Ríkið þarf að beita sér í að lækka þann kostnað sem að heimilin þurfa að greiða í þennan lið,“ segir Þórhildur.