Ný veiðibók frá Sigga Haug

Það er nokkuð klárt mál að flestir laxveiðimenn hafa á einhverjum tímapunkti hnýtt undir einhverja af flugunum hans Sigga og þá er Haugurinn líklega ein af þeim vinsælustu í Íslenskum laxveiðiám. Þetta er þriðja bókin á jafn mörgum árum frá þessum heimsþekkta fluguhnýtara, gæd og laxveiðimanni. Bókin heitir Veiði, von og væntingar og er bæði gullfalleg og innihaldsrík.

Siggi fer yfir veiðitækni (andstreymisveiði, kasta undir horni, losað úr fiski, fiski landað svo eitthvað sé nefnt), hann sýnir meira en fimmtíu flugur sem hver heiðvirður laxveiðimaður og hver laxveiðikona þarf að kunna skil á og auðvitað fylgja dæmisögur, veiðisögur og ýkjusögur. Bókin er væntanleg í verslanir þegar líður á nóvember. Við óskum Sigga til lukku með bókina og það er ljóst að stangveiðimenn bíða í ofvæni eftir að fá þessa bók í harða pakkanum.