Útförin reynist vera aftaka nafnlauss manns

Hjalti Freyr Ragnarsson skrifar 19. október 2021 14:29

Svertuskotna-mulningskjarnahljómsveitin Grafnár gefur í dag út myndband við lagið Ómennsk. Grafnár er orð yfir kviksetta manneskju, þ.e. grafna lifandi, og lætur tónlistarmyndbandið sveitina sannlega standa undir nafni.

Sveitin, sem samanstendur af Hrafnsunnu Ross söngvara, Kristján A. Reiners Friðrikssyni gítarleikara, Hallmari Gauta Halldórssyni bassaleikara og Øgmundi Kárasyni trommuleikara, hefur verið áberandi í grasrótarsenunni síðustu ár. Í vor lenti sveitin svo í þriðja sæti Músíktilrauna.

Lagið verður hluti af splitti sveitarinnar með fornfrægu mulningssveitinni Forgarði helvítis sem stefnt er á að komi út á næsta ári. Hljóðritun, hljóðblöndun og hljóðjöfnun var í höndum Ægis Sindra altmúligtónlistarmanns og leikstýrði Heimir Snær Sveinsson myndbandinu.

Hugmyndin af því hafi kviknað út frá kápu EP-plötu Grafnás, Útför heiguls, sem kom út árið 2019. Þar sést manneskja liggjandi í opinni líkkistu, bundin með hettu yfir höfðinu. „Sú hugmynd kom upp að láta myndbandið gerast í útför í kirkju, sem reynist síðan vera aftaka nafnlauss manns,“ segir Heimir. „Við vildum ná einhverri b-mynda, költ hrollvekju stemningu með leiknu atriðunum og tengja það við drungann í laginu.“

Tengdar fréttir

Ólafur Kram sigraði í Músíktilraunum

Hljómsveitin Ólafur Kram bar sigur úr bítum í Músíktilraunum, sem fór fram í Hörpu í gær. Tólf hljómsveitir tóku þátt í keppninni og eftir æsispennandi úrslitakvöld var niðurstaða dómnefndar og símakosninga kynnt.

30. maí 2021 14:08