Þrjú lið enn með fullt hús stiga | Cloud9 og Fnatic með bakið upp við vegg

Royal Never GiveUp og Hanwha Life mættust í fyrsta leik dagsins. Nokkuð jafnræði var með liðunum framan af leik, en liðsmenn Royal Never Give Up virtust þó vera skrefinu á undan. Hanwha Life hélt þó möguleikum sínum lifandi, og lengi vel leit út fyrir að með smá heppni gætu þeir snúið leiknum sér í hag. Það gekk þó ekki upp og Royal Never Give Up kláraði þriðja sigurinn sinn í jafn mörgum leikjum eftir rúmar 40 mínútur af League of Legends.

Annar leikur dagsins var viðureign MAD Lions frá Evrópu og LNG frá Kína. MAD Lions hefur af mörgum verið spáð nokkuð góðu gengi á mótinu, en þeir lentu í basli með LNG og hafa nú aðeins unnið einn af þrem leikjum sínum. LNG hefur hins vegar komið nokkuð á óvart eftir að hafa komið í gegnum undanriðlana og sitja nú jafnir Gen.G í fyrsta sæti D-riðils.

FPX vann svo nokkuð þægilegan sigur gegn Rogue í þriðju viðureign dagsins, áður en komið var að leik PSG Talon og Fnatic.

PSG Talon tók þar forystuna eftir tæplega tíu mínútna leik, en það tók Fnatic rétt undir fimm mínútur að jafna leikinn á ný. Þegar um tuttugu mínútur voru liðnar af leiknum voru það liðsmenn Fnatic sem höfðu tekið forystuna, en þá var komið að PSG Talon og snúa leiknum sér í hag á ný.

Svona gekk þetta fram og til baka þar til að eftir rúmar 45 mínútur af League of Legends að PSG Talon náði loks að klára leikinn og tylla sér í annað sæti C-riðils. Fnatic er enn í leit að sínum fyrsta sigri og þurfa að öllum líkindum að vinna alla sína leiki sem eftir eru til að eiga möguleika á að komast upp úr riðlinum.

Gen.G og DWG KIA unnu svo nokkuð sannfærandi sigra í fimmta og sjötta leik dagsins. Bæði liðin voru að spila gegn Bandarískum liðum, en Gen.G sigraði Team Liquid, og heimsmeistararnir í DWG KIA eru enn taplausir eftir sigur gegn Cloud9.

Cloud9 er þó í erfiðri stöðu í A-riðli, en liðið hefur ekki enn unnið leik þegar að riðlakeppnin er hálfnuð, og það verður að teljast ólíklegt að liðið taki sigra gegn heimsmeisturum seinustu tveggja ára í FPX og DWG KIA til að halda vonum sínum á lífi.

Taplaust lið Edward Gaming lenti svo í óvæntu basli í upphafi leiks gegn DetonatioN FocusMe, en þeir síðarnefndu komu inn í leikinn í leit að sínum fyrsta sigri.

Eftir rúmar tuttugu mínútur snéru liðsmenn Edward Gaming leiknum þó sér í vil, og unnu að lokum góðan sigur.

Seinasti leikur dagsins var svo viðureign 100 Theives og T1. Sá leikur varð í raun aldrei spennandi því að T1 tók afgerandi forystu snemma, og eftir tæplega hálftíma leik var öruggur sigurinn þeirra.

Nú þegar riðlakeppnin er hálfnuð mun leikjafyrirkomulagið breytast. Í stað þess að öll lið leiki einn leik á dag verða riðlarnir núna kláraðir hver á fætur öðrum. Eins og gefur að skilja er það A-riðill sem klárast á morgun með sex leikjum. Ef tvö lið eru jöfn þurfa þau að spila innbyrgðis til að skera úr um úrslit riðilsins.

Eins og áður verður hægt að fylgjast með leikjum morgundagsins í beinni útsendingu á Stöð 2 eSport frá klukkan 11:00