Áfram hjá KA en fær ekki að spila fyrstu þrjá leikina

Brkovic fékk að líta rauða spjaldið alls þrisvar sinnum í sumar, síðast í lokaumferðinni þegar KA gerði 1-1 jafntefli við FH og rétt missti af 3. sæti deildarinnar. Hann var því úrskurðaður í þriggja leikja bann á fundi aga- og úrskurðarnefndar og það bann fylgir honum yfir á næstu leiktíð.

Brkovic lék alls 20 leiki í deild og bikar fyrir KA í sumar og skoraði eitt mark. Hann átti stóran þátt í því að KA fékk næstfæst mörk á sig í deildinni eða 20 mörk í 22 leikjum.

Brkovic er 32 ára gamall og kom til KA fyrir nýliðið tímabil. Hann hefur leikið yfir 150 leiki í Ungverjalandi og varð ungverskur meistari árið 2014. Hann hefur einnig leikið um 70 leiki í efstu deild í Serbíu en kom til KA frá Diósgyöri í Ungverjalandi.