Sagan ekki með Eng­lendingum

England og Ítalía mætast á Wembley-leikvanginum í Lundúnum í kvöld. Er þetta fyrsti úrslitaleikur Englands á EM og fyrsti úrslitaleikur liðsins síðan árið 1966 þegar liðið varð heimsmeistari – á Wembley í Lundúnum.

Þó það hljómi eins og sagan sé hliðholl Englendingum þar sem leikurinn fer fram á heimavelli þá er ekki svo.

Ítalía hefur fjórum sinnum orðið heimsmeistari [1934, 1938, 1982 og 2006] ásamt því að enda í öðru sæti bæði 1970 og 1994. Þá varð Ítalía Evrópumeistari árið 1968 ásamt því að enda tvívegis í öðru sæti, 2000 og 2012.

Það má því segja að Ítalir hafi töluvert meiri reynslu af úrslitaleikjum heldur en Englendingar. Ef það er ekki nóg þá hefur Ítalía ekki enn tapað fyrir Englandi er liðin mætast á stórmóti.

Ítalía vann 1-0 er liðin mættust í riðlakeppni EM árið 1980 þökk sé marki Marco Tardelli. 

Tíu árum síðar mættust þau í bronsleiknum á HM þar sem Ítalía vann 2-1 sigur. Roberto Baggio kom Ítalíu yfir, David Platt jafnaði metin áður en Salvatore Schillaci skoraði sigurmarkið úr vítaspyrnu undir lok leiks.

Á Evrópumótinu 2012 mættust þjóðirnar í 8-liða úrslitum EM. Leikurinn var markalaus eftir bæði venjulegan leiktíma og framlengingu. 

Í vítaspyrnukeppninni skoraði Andrea Pirlo úr einni eftirminnilegustu vítaspyrnu sögunnar þar sem Ítalír skoruðu úr fjórum spyrnum en Englendingar aðeins tveimur.

Tveimur árum síðar mættust liðin í riðlakeppni HM þar sem Ítalía hafði betur 2-1. Claudio Marchisio kom Ítalíu eftir sendingu frá Marco Veratti - sem byrjar að öllum líkindum leik kvöldsins - en Daniel Sturridge jafnaði skömmu síðar. 

Mario Balotelli tryggði svo sigur Ítala með marki þegar fimm mínútur voru liðnar af síðari hálfleik. 

Úr leikmannahópi Englands þann daginn eru þrír sem munu vera í hópi kvöldsins. Jordan Henderson og Raheem Sterling byrjuðu leikinn á meðan Luke Shaw sat á bekknum.

Hjá Ítalíu voru fimm sem verða í hópnum í kvöld. Giorgio Chiellini og Veratti voru í byrjunarliðinu á meðan Ciro Immobile, Leonardo Bonucci og Lorenzo Insigne voru á varamannabekknum.

Athygli vekur að Björn Kuipers dæmdi téðan leik en hann dæmir einnig leik kvöldsins. Það er ljóst að ef England ætlar að takast hið ómögulega og „fá fótboltann heim“ þá þarf liðið að gera eitthvað sem því hefur aldrei tekist áður, leggja Ítalía að velli á stórmóti.

Enska liðið hefur hins vegar slegið niður hvern vegginn á fætur öðrum það sem af er móti. Því skyldi engan undra ef liðinu tækist hið ómögulega í kvöld. Það að liðið sé komið í úrslit kemur þó ekki öllum á óvart.

„Það var frekar augljóst að England myndi komast í úrslitaleikinn þar sem þeir spiluðu sex af sjö leikjum sínum á heimavelli,“ sagði Chiellini, miðvörður ítalska landsliðsins. 

Það er undir miðverðinum komið að stöðva sóknarmenn enska liðsins og þakka niðri í þeim tugum þúsunda enskra stuðningsmanna sem verða á leiknum.

EM 2020 verður sýnt á Stöð 2 Sport EM 2020 sem er hluti af Sportpakkanum, Stóra pakkanum og Risapakkanum. EM 2020 er einnig hægt að kaupa stakt á lækkuðu verði frá og með 24. júní á kr. 3.990.